Wir Vlreich, Johans vnd Hainreich von Rosenbergh vnd Hainrich der Elter vom Newnhaus Bechennen mit disem briefe daz wir mit dem Hochgebornen fürsten Herczog Albrechten von Österreich et ceter (sic), vnd allen seinen Helferen einen rechten fride vncz auff Sande Jorgen tag der schierest chumpt, den selben tag gancz vnd gar mit allen vnsern Helferen getrewleich an alles geuerd halten wellen. vnd sullen, Were aber, des Got nicht engebe, das icht geschech, da mite dem vorgenanten fu^ersten Herczog Albrechten von Österreich deuchte, daz der fride zebrochen würde, So sullen wir vmb die selben sache für vnsern genedigen Herren den Römischen vnd Behemischen Chunig chomen vnd Sollen danne tun alles das swas er eruindet. Vnd das geloben wir mit vnsern trewn bey vnsern eren in aydes geweys, daz wir das alles, als es oben geschriben ist, stete haben schullen vnd vellen, Vnd des zu vrchund geben wir disen vnsern brief versigelten mit vnsern anhangunden Jnsigeln, der gegeben ist zu Chrumpnawe des Suntags vor dem Newn Jare da man zalte nach Christes geburte drewczehen Hundert Jar dar nach in dem Ain vnd Achczigistem Jare.

Source Fulltext: OÖUB 9 (Wien 1906), S. 913