Wier Albrecht von gots gnaden Herczog ze O^esterreich, ze Steyr, ze Kernden vnd ze Krayn, Graf ze Tyrol etc. Bekennen vnd tu^en chunt, Daz fur vns kom vnser getrewr Wernhart der alt Mautter ze Lyntz vnd pat vns, daz wier im in namen vnd an stat Chla^erleins weilent seins Bru^oder seligen Peters vnsrer Hertzoginn Chamerer Tochter verleihen geru^ochten ein Hu^ob vnd ein Gu^ot ze Gru^ob in Puchenawer Pharr vnd das halbe Vrfar ze Atenshaim, die desselben To^echterleins Lehen von vns sind nach seiner brief sag, die es von vns hat. Das haben wir getan vnd haben zu seinen vnd seiner erben Svne vnd to^echter handen dieselben lehen dem vorgenanten seinem Vettern Wernharten verlihen vnd leihen auch mit disem brief, was wir ze Recht daran leihen sullen oder mugen Also, daz er die dem egenanten kinde ze frumen vnd nutze innehaben sol so lang, vntz es zu seinen rechten tegen kome vnd dieselber inne gehaben muge im vnd seinen erben Svnen vnd To^echtern nach seiner brief sag von vns vnd vnsern erben in lehens weis, als lehens vnd landes recht ist. Darzu^o haben wir dem egenanten Wernharten die gnad getan, Wer, daz dasselb To^echterl abgieng an erben Sune vnd to^echter, vnd vns die egenanten lehen damit ledig wu^erden, daz si denn auf den egenanten Wernharten vnd seine erben Svne vnd to^echter geuallen sullen Auch von vns vnd vnsern erben in lehens weis inne ze haben vnd ze niezzen, als Lehens vnd Landes Recht ist. Mit vrchund ditz briefs. Geben ze Wienn an sand Thomas tag des Bischofs ze Weichnachten Nach Christes geburt Dreutzehen hundert Jar, darnach in dem Ain vnd Achtzigisten iare. dominus dux per se ipsum.

Source Fulltext: OÖUB 9 (Wien 1906), S. 912