Ich Peter der Pfarrer datz sand Veit ob Gra^ecz vergich für mich vnd für all mein Nachomen, Offenleich mit dem brief vmb den Ember Perchrecht Chaufmazz gelegen auf aim weingarten vnd auf aim Akcher ob Stadekk, den zu der Zeit Nicla der Chraechler ynne hat, den vns der Erber Her Her Peter von Losenstain für sich vnd für seinen Vettern Dietlein Herrn Dietreichs selig Su^on vnd für all ir Erben durch irr vnd aller irer vodern vnd Nachomen Sel Hail willen, geben habent, Also daz ich vorgenanter Peter vnd all mein Nachomen Jerleich vnd ewichleich all Svntag, auf dem Lekker pitten sullen, vmb sew, vmb all ir vodern vnd nachömen vmb Lebentig, vnd vmb tod, Vnd wer auch, daz ich vorgenanter Peter vnd mein Nachomen daz nicht volfürten, alz vorgeschriben stet, So mu^ogen sew sich oder ir gescheft, desselben Ember Perchrecht wol vnder winden alz lang vntz daz wir allez daz volfüren, daz vorgeschriben stet, Vnd dez ze Vrchund Gib ich in den brief versigelten für mich vnd für all meine Nachomen mit meins Lieben Herren Hern Giligen Pharrer ze Gra^etz vnd mit des Erbern Erharts dez Chrel mit ir paider anhangunden Jnsigeln, die sew durch meine vleizzig pet ze einer geczeugnuzz daran gehangen habent, dem vorgenanten Hern Giligen an schaden, vnd dem vorgenanten Erharten dem Chrel vnd seinen Erben an schaden, vnd dar vnder ich mich obgenanter Peter der pharrer vnd all mein nachömen verpinden allez daz stet ze haben vnd gepunden sein, alz vorgeschriben stet, Wand ich selb zu der zeit nicht aigens Jnsigels gehabt han. Geben nach Christes gepurd Drewczehen hundert iar darnach in dem Achczigistem iar, dez Phincztags vor sand Kathrein Tag.

Source Fulltext: OÖUB 9 (Wien 1906), S. 898-899