Wir Albrecht von gots gnaden Herczog ze O^esterreich, ze Steyr, ze Kernden vnd ze Krayn, Graf ze Tyrol etc. Bekennen vnd tu^on kunt offenlich mit disem brief, Daz wir vnserm getrewn Hainreichen yeczunt Schaffer ze der freynstat durch der getrewen dienst willen, die er vns getan hat vnd noch furbaz tu^on sol vnd mag, die Vischwaid bey der freynstat von der Weyrmul in den Wu^ergraben vnd in der Altach auf der Ayst vncz auf des Heussen Wu^or ob der Padstuben an dem Gries ze lehen verlihen haben vnd leihen auch wissentlich mit disem brief, Also, daz er vnd sein erben dieselben Vischwaid von vns, vnd vnsern erben in Lehens weis innehaben vnd niezzen sullen vnd mugen, als Lehens vnd Landes recht ist, vnd auch allen i^eren frumen damit schaffen ze verkauffen, schaffen, oder geben, wem Si wellen, doch mit vnsrer hant, gunst vnd v^erlaub, Also, daz es vns, an vnsrer Lehenschaft nicht ze schedlich oder vergriffenlich sei. Auch sullent Si, oder in wes hand dieselb Vischwaid nv furbaz i^emmer kumt, vns vnd allen vnsern erben davon getrew vnd gewer sein, vnsern frumen trachten vnd vnsern schaden wenden allenthalben nach allem i^erem vermugen, als Manne i^eren herren pillich tu^on sullent an allez geuerd. Mit vrkund dicz briefs. Geben ze Wienn an Phincztag vor sand Cholmans tag Nach Christes gepurd dreuczehenhundert iar vnd darnach in dem Achczigisten iare. dominus dux per Ch. Notarium Camerae.

Source Fulltext: OÖUB 9 (Wien 1906), S. 889-890