Ich Nikla der Chalb von Hayminge, mein Havsfraw vnd alle vnser erben veriehen offenbar mit dem brief, Daz wir mit wolbedachtem mu^ot vnd mit gu^etleichem vnserm willen recht vnd redleichen ze chävffen geben haben auz vnserr nu^eczz vnd gewer in di iren dem erbern Herren Hern Jo^ergen dem Ahamer ze dem Nevnhäws seiner havsfräwn vnd allen iren erben, vnser gu^et dacz Swal, daz gelegen ist in dem Weilhart gericht in dem Überakchertal mit allen den ern rechtten gu^elten nu^eczen vnd gesvechen, di dar zw^e geho^ernt vnd da von becho^emen mu^egen, besuecht vnd vnbesuecht vnd als wir daz selb gehandelt, genozzen vnd inne haben gehabt bis auf disen hevtigen tag, auzgenomen der Eribschaft die di erben habent auf dem vorgenant gu^et, nach der brief sag, di si dar über von vns habent, vmb so^elich gelt, daz si vns nach vnserm willen gar vnd gänczleich verricht vnd gewert habent, Vnd verzeihen auch vns dez vorgenanten gütz mit dem gagenwurttigen brief, also daz wir noch dhain vnser erib noch frevnt da hin nicht mer ze sprechen noch ze vodern haben, weder mit recht noch an recht. Wir süllen vnd wellen auch dez vorgenanten gütes ir vertreter, vorsprecher, verantwurtter vnd gewern sein, wo in dez no^et geschiecht, alz dez Landes recht ist. Wär aber, daz in dhain chrieg, stözz oder irrung dar inne wider fu^eren, daz wa^er von vns selb oder ander iemant von vnsern wegen, daz süllen wir in auz tragen vnd richttich machen, an allen iren schaden. Taeten wir dez nicht, vnd na^emen si dez icht schaden, den si gesprechen mo^echtten bei irr beschaiden an ayde, di selben schaeden mit sampt dem hav^optgüt süllen si haben vnd becho^emen dacz vns vnsern trewn, darczw auf aller vnserr hab, swo wir di habn oder lazzen, besuecht vnd vnbesuecht, vor allen andern la^ewten vnd vnsern geltern, Vnd ob wir dar über mit in ze recht oder ze chrieg chaemen die selben recht vnd chrieg süllen si allezeit hincz vns behabt haben vnd wir verloren. Wer auch den brief inne hat mit irem gu^etem willen vnd den für pringet, der hat alle die recht in aller der mazz, als in selben oben ist verschriben. Vnd dar über ze einer vrchünde geben wir in den brief mit meinem egenant Nikla dez Chalb aygen anhangendem in Sigel versigelten, dar vnder sich ze sampt mir mein Havsfräw vnd alle vnser erben mit vnsern trewn verpinden, allez daz staet ze haben, daz oben ist verschriben. Der brief ist geben, do man zalt von kristi gepu^ert drewczehen hvndert iar vnd in dem akchigistem jar an sand Michahelstag.

Source Fulltext: OÖUB 9 (Wien 1906), S. 888-889