Ich Hainreich der probst, Vllreich der preiol vnd die Savmnvng gmain von sein Marein slag lazen wizzen mit disem prief, daz man vns gepeten hat, daz wir vnser chvndschaft sagen, wie vnd wer den walt, den man haizt dez Morspekkenwalt, inne gehabt hat vntz auf dise tzeit. So sprechen wir pei vnserr gwizzen, daz wir von den alten wirdigen herren vnsers chlosters vnd von erbern alten levten lain auch gehört haben, daz derselb vorgenant walt wart geben den herren von Mawerperg von ainem Morspekken, dez rechtes vaeterleichs erbtail er waz, vnd der fuer in iren orden datz Mawerperg, alzo hetten di selben herren von Mawerperg den selben walt inne etleich tzeit vnd merkten vnd nomen daz avs, daz in der walt nicht nvezz waz, vnd si liezen in ligen manich iar alzo daz niemant achtat dez walds, vntz daz her Chvnrat von Tannberch sich vnterwant dez walds, dauon daz er her Jannsen von Morspach peim inne het, vnd des gedenken wol svmleich herren vnsers chlosters, di noch lebent, vnd ainchleich erberr levte, di avch lebent, do derselb her Janns der Morspekk ain vrawen nam, der hett den selben walt inne etleich iar vnd gerb wold er ezv dem selben wald sein. Dez mainten aver di herren von Mawerperg nicht vnd ander erber herren wolden sein nicht. Do chavfat her Eberhart von Walze, dem got gnad, den walt von den herren von Mawerperg vnd er enphalh in seinen phlegern datz Valkenstain nvr czy ainer pit, vncz daz er in wider verchaufat, vnd dez gedenken wir wol vnd er hat vns den walt oft angepoten, daz wir in von im chavften, da von daz der walt leit gor nahen pei vns. Vnd daz dise vorgeschriben red gancz vnd wor sei, darvmb haben wir disen prief veringsigelten mit vnsern paiden jngsigeln anghengt des probsts vnd dez convents. Der prief ist geben nach Christs purd drevczenhvndert iar dar nach in dem ain vnd achczigstem iar am Phindstag in der heiligen Osterwochen.

Source Fulltext: OÖUB 10 (Wien 1933), S. 40