Wir Albrecht von Gotis genaden herczog zu Österreich zu Steyr zu Kernden vnd zu Krain graf zu Tyrol etc. embieten vnserm getrewn dem pfleger zu Steyr, wer der ye ist, vnser gnad vnd allez gut. Wir haben vnsern purgern gemainleich ze Steyr solich recht vnd genade gegeben, wa ir ayner mit seiner habe in vnserm lande zu Österreich auf wazzer vare, ez sei auf der Ens oder auf der Tunaw oberhalb oder nyderhalb der Ens mit flözzen oder mit scheffen, vnd daz er auf eynen grunt oder auf eynen erich rynne, daz er darumb nyemanne ichts gepunden sein sol in dehaine weis, denne alain ob er rvnne auf ein mul, swas er daran schaden tut, da sol er ynne leiden, alz das von alter herkomen ist, vnd nicht anders. Dauon emphelhen wir dir ernstlichen, ob yeman die egenanten vnser purger von Steyr auf der Ens dawider besweren wolt, wer der were, daz du yn des vorseist vnd si pei den egenanten genaden vnd rechten vesticlichen von vnsern wegen haltest vnd schirmest, wan wir das ernstlich mainen. Geben zu Steyr an sande Thomas tag des zwelfpoten anno domini millesimo trecentesimo octuagesimo primo. Dominus dux et consilium.

Source Fulltext: OÖUB 10 (Wien 1933), S. 72-73