Wir Albrecht von Gotts gnaden herczog zu Österreich zu Steyr zu Kernden vnd zu Krain graf zu Tyrol etc. embieten vnsern getrewen dem richter, dem rat vnd den purgern gemainlichen zu Waidhouen auf der Ybs vnser gnad vnd allez gut. Vmb die mautt vnd zol, die weilent der durleuchtige furste vnser lieber bruder herczog Rudolf von Österreich seliger gedechtnusse euch vnd ewrer stat hieuor erlaubt hat zu nemen vncz an sein oder seiner erben widerruffen nach seiner prief sag, lazzen wir euch wissen, daz vns darumb von vnsern getrewen vnd vndertanen klage komen ist, vnd dauon so nemen wir dieselben ewr mautt vnd zol vnd auch die prief, so ir daruber habt, wider ab vnd widerruffen die wissentlichen mit dem prief vnd gepieten euch, daz ir die furbas nicht mer nemet in dehain weis, oder ir tetet wider vns. Geben zu Steyr an sand Thomas tage des zwelfpoten anno domini MCCCLXXX primo.||
Dominus dux et consilium.

Source Fulltext: OÖUB 10 (Wien 1933), S. 75