Wir graf Heinrich von Schawnberg der elter vnd wir graf Heinreich vnd graf Vlrich von Schawnberg, desselben graf Heinrich des eitern sün, bechennen vnd tun chunt offenlichen mit dem brif für vns (vnd) all vnser erben vnd nachkomen, vmb di vest vnd herschaft Julbach mit allem zugehörn, di di hochgeborn fürsten vnserr lieben genädigen herrn hern Stephann hern Fridrich vnd hern Johannsen pfallenczgrafen by Rein vnd herczogen in Beyern etc. jn pfantschaft weis jnne gehabt habend, nach der brif lawt vnd sag, di sy darüber jnne habend, das wir vns derselben vest vnd herschaft Julbach mit allem zugehörn verzigen vnd jn irn erben vnd nachkomen di geaigent haben, verzeihen vnd aigen in di auch mit chraft dicz brifes, also das wir noch nymant anders von vnsern wegen, hintz der vest vnd herschaft Julbach mit allem zugehörn dhein ansprach nymmer mer gehaben noch gewinnen sullen noch wellen weder mit recht noch an recht in dhein weis, vnd auch di vest vnd herschaft Julbach mit allem zugehörn jr aigen hab vnd gut ist, als ander ir aigen hab. Auch bechennen wir vmb di brif, di wir oder vnser vodern haben oder gehabt haben vber die vest Wildenekk mit allem zugehorn von den obgenanten vnsern herrn von Beyern vnd irn vodern, das di selben brif auch all ab vnd tod sind vnd dhein chraft noch macht nicht haben süllen, vnd ob derselben brif ainer oder mer verfieln vnd fürbas für chämen, die sullen auch dhein chraft nicht haben, wann wir jn di brif vber Wildenekk gern wider geben heten, da heten wir yr by vns nicht, vnd sullen noch wellen nach der vest Wildenekk auch dhein ansprach nymmer mer gehaben noch gewinnen noch nymant von vnsern wegen in dheinerlay weis. Vmb das alles, das an dem brif verschriben stet, habend vns di obgenanten vnser herrn von Beyern getan, des vns wol benügt hat. Vnd des zu ainem warn vrchund vnd sicherhait geben wir vnsern egenanten herrn von Beyern irn erben vnd nach komen den brif versigelt mit vnserm graf Heinrich des eltern vnd graf Heinrich des jungen anhangenden jnsigeln. So verpinden wir vns graf Vlreich von Schawnberg vnder di selben zway jnsigel für vns all vnser erben vnd nachkomen mit vnsern trewen mit sampt vnserm vater vnd bruder, alles das stat zu haben, das an dem brif verschriben stet, trewlichen an alles geuerde, wann wir di zeit nicht jnsigels heten. Geben ze Schawnberg an dem Suntag, als man singet Reminiscere in der Vasten, nach Kristi geburtt drewczehen hundert jar vnd darnach in dem zway vnd achczgisten jare.

Source Fulltext: OÖUB 10 (Wien 1933), S. 92-93