Ich Hans der Chnäwzzer vergich für mich vnd für all mein erben vnd tun kunt offenleich mit dem brief allen den, die jn lesent oder hörent lesen, die nv lebent vnd hernach chunftig sint, daz ich mit aller meiner erben gutem willen vnd gunst mit wolbedachtem mut zu der zeit, do ich es wol getun mocht, recht vnd redlich verchaufft vnd gegeben han dem durichlautigen hochgeporn fürsten meinem genedigen herren herczog Albrecht ze Österreich ze Steyr ze Kernden vnd ze Krain grafen ze Tyrol etc. vnd seinen erben mein vest Sachsenekk, die rechtes aigen ist, vnd darczu sechczig phunt wienner phenning geltes gelegen in den hernachbenanten pharren auf behaustem bestifftem gut vnd auf vberlent. Von erst in sand Thomans pharr drewczehen phunt vnd syben vnd vierczig phenning geltes, gelegen auf vier höfen vnd auf syben lehen vnd auf zwain hofsteten, ayn mutt vnd achthalber metzen chorn für fümfczehen schilling, ayn mutt vnd acht metzen habern für syben schilling vnd achtzehen phenning, anderthalben metzen magen für drey schilling, aynen metzen pon für zwaintzig phenning, newn vnd zwaintzig chäs für fümf schilling vnd vier vnd zwaintzig phenning, syben schilling vnd zehen ayr für zwen vnd zwaintzig phenning, drew vnd zwaintzig herbsthüner für sechs vnd viertzig phenning, zwelif vaschang hüner für acht vnd viertzig phenning, anderhalb schot hor für sechs vnd dreizzig phenning, zwo schultern für acht phenning, weychnacht erung achczehen phenning, dienst phenning auf den vorgenanten gütern für acht phunt vnd syben vnd sybenczig phenning. Darnach in Rechperger pharr newn schilling vnd newnthalben vnd zwaintzig phenning geltes auf einem halben lehen vnd auf zwain hofsteten, die dienent ayn phunt vnd sechczehenthalben phenning, drey ches für vier vnd zwaintzig phenning, dreizzig ayr für drey phenning, vier herbsthüner für acht phenning, zway vaschang hüner für acht phenning. Darnach in Münspekcher pharr ayns vnd zwainczig phunt vnd aynen vnd zwainczig phenning vnd aynen helbling geltes auf sechs höfen auf newn lehen^a) vnd auf acht hofsteten, die dienent viertzig metzen chorn für zway phunt phenning, vier vnd viertzig metzen habern für ayn phunt vnd vier vnd zwaintzig phenning, einen halben metzen magen für dreizzig phenning, fümfczig ches für zehen schilling vnd vierzehen phenning, zway phunt ayr vnd zwainczig ayr für fümfczig phenning, newn vnd dreizzig herbsthüner für acht vnd sybenczig phenning, ayns vnd zwainczig vaschang hüner für vier vnd achczig phenning, ayn gans für sechs phenning, weichnacht erung drey schilling vnd zehen phenning, zway lempper für vier vnd zwainczig phenning, auf vberlent dreizzig phenning vnd ayn helbling vnd ayn schot hor für vier vnd zwainczig phenning, dienstphenning vierczehen phunt syben schilling vnd syben phenning. In sant Jörger pharre fümfczehen schilling vnd sechczehen phenning geltes auf sechs lehen, dienent zwelif schilling phenning, sechstawsent stekchen oder drey Schilling phenning, vier herbsthüner oder acht phenning, zway vaschanghüner oder acht phenning. Darnach in Mitterchiricher pharr drewzehen phunt vnd sechs vnd zwainzig phenning geltes auf zwain höfen auf dryn lehen vnd auf sechs hofsteten, dienent drey mutt chorn für fümfthalb phunt phenning, zwen mutt vnd sechs vnd zwaintzig metzen habern für zway phunt vnd sechs vnd dreizzig phenning, fümf metzen waytz für drey schilling phenning, ayn metzen hanif für zwaintzig phenning, dienstphenning drew phunt syben schilling vnd drey vnd dreizzig phenning, dreizzig ches für fümf schilling vnd acht vnd zwaintzig phenning, ayn phunt ayr für vier vnd zwaintzig phenning, czwainczig herbsthüner oder vierczig phenning, zehen vaschanghüner oder viertzig phenning, zwo gens oder zwelif phenning, drei schot hor für zwen vnd sybenczig phenning, weichnacht erung zwainczig phenning, auf vberlent drey schilling vnd sechs phenning. Darnach in Sechsner pharr auf zwain lehen auf zwain hofsteten vnd auf zwain zehenten in derselben pharr, der ayner gelegen ist auf dem Letten auf fümf höfen auf acht lehen vnd auf newn hofsteten, der da pringet ze mittern jarn anderthalben mutt chorn vnd anderthalben mutt habern, vnd der ander zehent ist gelegen ze Weczleinstorf, der da auch ze mittern jarn pringet achczehen meczen chorn vnd achczehen meczen habern, dieselben zwen zehent sint geraittet für vier phunt vnd zwen vnd zwainczig phenning geltes, phenning gült ayn phunt syben schilling vnd vier phenning, vier ches oder vier vnd zwainczig phenning, zway vaschanghüner oder acht phenning, zway herbsthüner oder vier phenning, vierczig ayr oder vier phenning vnd auf vberlent sybenczig phenning, vnd die obgenanten zwen zehent vnd der dienst pringet also miteinander an der svmm sechs phunt drey schilling vnd sechczehen phenning geltes. Darnach in Erbinger pharr zway phunt syben schilling vnd fümf vnd zwainczig phenning geltes auf aynem lehen vnd auf dryn hofsteten, dienent ayn phunt vnd drey schilling phenning, acht ches oder acht vnd vierczig phenning, vier ches oder zwelif phenning, dreizzig ayr oder drey phenning, zway vaschanghüner oder acht phenning, weichnacht erung vier vnd zwainczig phenning, sechczehen meczen chorn für sechs schilling vnd zwelif phenning, achczehen meczen habern für drey schilling vnd achczehen phenning. Vnd also pringet die svmm des vorgenanten dienstes alles sechczig phunt geltes vnd darczu mein zwen höf, ayner genant der Tröppelhof vnd der ander genant auf dem Hinterperg, bayd gelegen bey der egenanten vest Sechsenekk mit allen irn zugehörungen, die zu derselben vest voraus gehörnt, vnd die lehenschaft der chappelln gelegen in derselben vest, mit aller irer zugehörung. Dieselben vest Sechsenekk mitsampt den egenanten sechczig phunten geltes auf den vorgeschriben gütern allen vnd alles das, daz zu derselben vest Sechsenekk vnd zu den vorgenanten gülten vnd gütern allen gehöret, läwt vnd gut vischwayd wayd wismat ekcher phenning gült behausts gut vberlennt in vrbar ze holcz ze veld vnd ze dorff, es sey gestifft oder vngestifft, versucht oder vnuersucht, wie das genant ist, han ich dem vorgenanten meinem genedigen herren herczog Albrechten ze Österreich etc. vnd seinen erben recht vnd redleich verchaufft vnd geben mit allen den nüczen ern rechten vnd zugehörungen, als ich die vorgenant vest vnd die vorgeschriben gült vnd güter allew vnd alles das, daz darczu gehöret, als vorgeschriben stet, in aygens gewer vnd die egenanten zwen zehent in lehens gewer herpracht han, vmb zway tawsent phunt wienner phenning, der mich derselb mein herr herczog Albrecht gancz vnd gar verrichtet vnd gewert hat, also daz er vnd sein erben sullen fürbaz dieselben vest Sechsenekk vnd die vorgeschriben gült vnd güter allew vnd alles das, daz darczu gehöret, mit allen nüczen ern rechten vnd zugehörungen, so vorgeschriben stet, ledichleich haben vnd allen irn frumen damit schaffen verchauffen verseczen vnd geben, wem si wellen, vnd alles das damit tun vnd handeln, daz jn allerpest fügt oder wolgeuellet an allen irrsal. Vnd sein auch wir ich egenanter Hans der Chnäwzzer vnd all mein erben der vorgenanten vest Sechsenekk vnd der vorgeschriben gült vnd güter aller mit allen irn zugehörungen vnd mit allen den nuczen ern vnd rechten, so vorbenant ist, des egenanten meins herren herczog Albrechts, vnd seiner erben recht gewern vnd scherm für alle ansprach aygens, als aygens recht ist, lehens, als lehens recht ist vnd des landes recht ze Österreich. Wer aber daz in an der vorgenanten vest oder an den egenanten sechczig phunten geltes vnd an allen irn vorgeschriben zugehörungen icht abgieng mit recht oder ob jn icht chrieges oder ansprach daran auferstünd, von wem das wer, mit recht, das stillen wier jn alles ausrichten vnd widerchern an all widerred vnd süllen si das haben auf vns vnd auf allem vnserm gut, daz wier haben in dem lande ze Österreich oder wo wier es haben, wier sein lebentig oder tod. Vnd daz der chauf fürbaz also stet vnd vnzebrochen beleib, darüber so gib ich obgenanter Hans der Chnäwzzer für mich vnd für all mein erben dem vorgenanten meinem herren herczog Albrechten vnd allen seinen erben den brief zu einem warn vrkunde der sach versigilten mit meinem insigil vnd mit der erbern herren insigiln herrn Kadolts von Ekharczaw, herrn Chunrats von Potendorf, herrn Hansen des Potenbrunner diezeit des egenanten meins herren herczog Albrechts hofmarschalich, vnd herrn Nyclas des Potenprunner seins pruder, die ich des gepeten han, daz si der sach gezewgen sint mit iern insigiln, in an schaden. Der brief ist geben nach Kristi gepurt drewzehenhundert jar darnach in dem zway vnd achczigistem jahre des Mantags vor dem Sonntag, als man singet Inuocauit in der Vasten.

Source Fulltext: OÖUB 10 (Wien 1933), S. 87-91