Wir Albrecht von Gotes gnaden herczog ze Österreich ze Steyr ze Kernden vnd ze Krain graf ze Tyrol etc. bekennen vnd tun chunt offenlich mit disem brief, wan wier angesehen haben die gebresten, die vnserer stat ze Lyncz von chrieges vnd anderer namlichen sachen wegen yecz lang zeit angelegen ist, vnd haben vnsern purgern daselbs ze Lyncz zu ergeczung der egenanten scheden vnd ouch durch nuczes aufnemen nemen vnd besunders frumes willen der vorgenanten vnsrer stat ze Lyncz ainen ewigen jarmarkt gegeben vnd in die genad getan vnd tun ouch wizzentlich mit disem brief, daz si auf sand Bartolomes tag alle iare ainen jarmarkt daselbs ze Lyncz haben vnd den da suchen lazzen sullen nach gewonhait des landes in Österreich vnd sol ouch da menichleich, wer dahin auf den selben jarmarkt chumpt, gewonlich freyung als auf andern vnsern jarmerkten in Österreich vmb all erber sachen vierczehen tag vor sand Bartolomes tag vnd vierczehen tag hinnach haben vnd niezzen vngeuerlich. Darumbe gebieten wier vnserm haubtman ob der Ens, wer der ye zu den zeiten da ist, allen vnsern herren rittern vnd knechten purggrafen phlegern amptleuten richtern mauttern purgern vnd allen andern vnsern vndertanen oberhalb vnd niderhalb der Ens, enhalb vnd hiedishalb der Tunaw, vnd wellen gar ernstlich, swer auf den egenanten jarmarkt oder von dannen mit seiner choufmanschaft oder sust zeuhet, daz ier den sicher leibs vnd gutes ziehen lazzet vnd belaittet, wo der des bedurffe, vnd bey den gnaden vnd f reyungen die vorgenant zeit behaltet vnd beleiben lazzet vnd dawider nicht tut in dhain weg. Wer aber dawider tet, das wer genczlich wider vns vnd wolten ouch den swerlich darumb pezzern. Vnd des zu vrchund, sicherhait vnd ewiger gezeugnuzz hiezzen wier vnser grozz fürstlich anhangendes jnsigel henken an disen brief, der geben ist ze Wienn an sand Lamprechtes tag nach Christes geburd dreuczehenhundert iar dornach in dem zwain vnd achczigistem iare.||
Dominus dux per se et dominus cancellarius audiuit.

Source Fulltext: OÖUB 10 (Wien 1933), S. 127-128