Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etc. tun chunt vmb die stözz, die da sind zwischen vnsern getrewn Otten dem Topler Hansen dem Heusler vnd Marcharten dem Heusler dem iungen on aim tail vnd Rugern von Starchenberg an dem andern von aller der hab güter vnd brief wegen, die Ruger selig von Starchenberg der iunger gelazzen hat, das vnsere herren zu dem rechten darumb erfunden habend, daz die vorgenanten Ott Topler, Hans vnd Marchart die Heusler auf daz nest chünftig hoftaiding her gen Wienn für vns chomen sullen vnd sich da gen dem vorgenant Rugern von Starchenberg verantwurtten von aller der hab vnd güter vnd brief vnd ouch des kindes wegen, das Ruger von Starchenberg selig der junger gelazzen hat. Teten si aber des nicht, so sullen wir vnsere herren nider setzen vnd daz recht darumb erfinden lazzen vnd sullen ouch die zeit die vorgenant güter vnd hab alle zu vnsern handen innemen. Mit vrchund dicz briefs geben ze Wienn an sand Marcelli anno etc. LXXXII.||
Dominus dux in consilio.

Source Fulltext: OÖUB 10 (Wien 1933), S. 80