Ich Chuenrat von Waesenberchk vnd mein hawsfraw vnd alle vnser erben wier vergehen vnd tuen chunt offenbar mit dem brif allen den, die den brif ansechnt oder hörnt lesen, die nu sind oder hernach chunffig werdent, daz wier mit wolbedachtem mutt vnd mit guetem willen aller vnser erben vnd nach ratt vnd weisung vnser nachsten vnd pesten frewnt zu der zeit, da wir daz wol tuen machten, recht vnd auch redlichen verchawft vnd zu chawfen gewen haben zu ainem rechten chawf nach lanndez recht ob der Enns dem erbern herrn herrn Ruegern von Starchnberchk vnd allen seinen erben, die er hat oder noch gewingt, vmb ain gelt, dez wier von in ganncz vnd gar gericht vnd gewert sein zu rechten tagen an allen vnsern schaden, vnsere gueter vnd zehent, so hernach in dem brif fürschribn sind. Von erst ain hof zu Luchenöd gelegen in Greymharczsteter pharr vnd dient jaerlichen zu vnser Vrawn tag zu der dienstzeit ain phunt winer phening vnd vier ches, jeden ches fur vier phening, vnd vier huen vnd dreizk air vnd zwelif phening für weinachtprat vnd stewr nach genaden, vnd ain hueb dacz dem Pleicholben gelegen in Greymharczsteter pharr vnd dient jerlichen zu vnser Vrawn tag zu der dienstzeit ain phunt winer phening vnd zwelif phening für weinachtprat vnd stewr nach genaden, vnd ain guet dacz Grillenperig gelegen in sand Johannser^a) pharr vnd dient jerlichen zu vnser Vrawn tag zu der dienstzeit vier meczen charn vnd sechczehen meczen habern vnd vier ches ieden ches für vier phening vnd vier huen, vnd ain schaett har für sechzehen phening vnd zwy phunt pawmöll für sechzehen phening vnd dreyczk sweinphening vnd dreyczk air vnd acht phening für weinachtprat vnd stewr nach genaden, vnd ain guet dacz Pawgarten gelegn in Veldchiricher pharr vnd daz rittermaeziges aygen ist vnd dient jerlichen zu vnser Vrawn tag zu der dienstzeit zwen vnd sybenczk phening vnd vier huen vnd stewr nach genaden, vnd ain guet dacz Weichelpawm gelegen in Greymharczsteter pharr, daz lehen ist, vnd ain guet dacz dem Jeger gelegen in Obern Newnchiricher pharr, daz lehn ist, vnd ain guet dacz dem Obern Reytt gelegn in Obern Newchiricher pharr, daz lehn ist, vnd ain guet dacz Weberdorf gelegen in Obern Newnchiricher pharr, daz lehen ist, vnd ain guet dacz dem Syghart gelegn in Greymharczsteter pharr, daz lehen ist, vnd zwen luss auf dem Stainach gelegen in sand Petringer pharr, die auch lehen sind, vnd vierczk zehent daz tritaill gelegen in payden Gengen vnd im Scheffekk vnd auf der Sawmstrazz, der gelegen ist in Zwetlinger pharr vnd in Greymharczsteter pharr, vnd dient man jerlichen davon zehen repphuen, vnd wazz wier dez zu lehen gehabt haben, alz oben in dem brif fürschriben ist, von dem edlen hochgeparn fursten meinem lieben herrn herzog Albrechten zu Osterreich vnd lehen ist von der grafschafft zu Waesenberchk vnd alz gelegen in Wesenberiger gericht, vnd wazz ich der obgenanten guetr vnd zehent gelichen han, die scholl der obgenant erber herr her Rueger von Starchenberchk vnd all sein erben fürwazz leichen; vnd syben zehent die zway taill auf dez Haedleins guetern gelegen in sand Steffans pharr vnd die ich zu lehen gehabt han von dem hochwirdigen fürsten meinem lieben herrn pischoff Johannsen zu Pazzaw, vnd ain guet dacz Lueg, daz rittermaszyg aygen ist vnd gelegen in Greymharczsteter pharr. Die obgenanten guetr vnd zehent, wie di alle genant sind oder wo dew gelegen sind, is sein verlechente gueter oder aygene guter vnd zehent mit aller ir zuegehorung vnd darzue gehort mit allen eren rechten vnd nuczen vnd dazue gehort zu holcz vnd zu veld zu waid zu wismad vnd zu den obgenanten guetrn vnd zehent gehort, is sey aygen oder lehen, aygen alz aygens recht ist, lehen alz lehens recht ist vnd dez lanndes recht ob der Enns, wie daz ales genant ist, is sey gepawt oder vnngepawt gestifft oder vngestift versucht vnd vnuersucht, alz inpeslozzen vnd nichcz auzgenamen, daz alz, alz oben in dem brif verschriben ist, haben wier gewen dem obgenanten erbern herrn herrn Ruegern von Starchenberchk vnd allen seinen erben, die er hat oder noch gewingt. Wier haben in auch dew obgenanten||
guetr vnd zehent ingeanttwurt vnd pestat mit hern hant vnd mit aller stat, der si darvber peduerfen, auz vnser nuczz vnd gewer in ier nuczz vnd gewer, daz si allen iern frum damit schullen schafen mit verseczn oder mit verchauwfen an alle jrrung. Wier sein auch der obgenanten gueter vnd zehent ier rechter gewer vnd fürstannd für alle ansprach, wo in dez nott vnd duerft geschicht, alz aygens recht ist vnd lehens recht ist vnd dez lanndez recht ob der Enns. Ging in an der gewerschaft icht ab mit recht, wazz si dez schaden namen, den ir ains gesprechen mag pey seinen trewen an ayd vnd vngeswarn vnd an allez recht ier ains warten darumb zu gelawben, den selben schaden allen zusampt dem hawpguet schullen wier in abtuenn vnd widerchern gancz vnd gar vnd schullen si den haben dacz vns vnd dacz vnsern trewen, darzu auf aller vnser hab, wo wier di haben oder lazzen auf wazzer oder auf lannt ynner lanncz oder auzer lanncz versucht vnd vnuersucht, der mugen si sich wol vnderwinden mit vns vnd aller vnser erben guetlichen willen vnd wart an chlag vnd an fürbott vnd an alles recht alz vil vnd alz lanng, vnczt daz si davon pechoment hawptgut vnd aller ierr schaeden gancz vnd gar, vnd schull wier daz mit nichte widersprechen noch dawider sein vil noch wenichk in chainerley weizz. Wazz wier dawider sprechen reten oder taeten, daz hat chain chraft nicht, daz haben wier vnd all vnser (erben)^b) gen in vnd gen allen iern erben gannczlichen verlarn vnd si vnd all ier erben an aller stat gannczlichen pehabt angefer. Das in die red stat vnd vnuerchert peleib, darvber geben wir in den offen brif fürsigelt mit meins obgenanten Chunrats von Waesenberchk aygen anhangundem insigel vnd zu zewgnucz mit meins swagerVlrich dez Snekkenreyter anhangundem jnsigel vnd mit meins swager Otten dez Chragen anhangundem insigel vnd zu ainer pesern sicherhait vnd zewgnuczz versigelt mit der erbern herrn hern Hainrichs von Walse anhangundem insigel vnd mit hern Reinprehcz von Walse von Enns anhanguntem jnsigel vnd mit Hannsen dez Schifer di zeit purgraff zu Waesenberchk anhangundem insigel vnd mit Otacher dez Piber anhangundem jnsigel vnd mit der obgenanten paiden herrn herrn Hainrichs von Walse vnd mit herrn Reinprechcz von Walse von Ens, mit der willen vnd gunst der chawf geschechen ist vnd daz si all vier an den brif gehangen habent zu zewg vnd||
durich vnser vleizzigen pett willen in vnd allen ir vier erbn an schaden, Vnder dew obgenanten jnsigel alle verpintt ich mich Angnes dew Chraegnynn vnd ich Vlrich der Chrag||
Otten dez Chragen sun vnd ich Chunygund die Poschin vnd all vnser erben vnd Vlrich dez Snekkenreytter erben mit vnsern trewn an aydez stat alz daz stat zu haben, daz oben an dem brif verschribn ist. Der brif ist gewen, da man zalt von Christi gepurd drewczehen hundert jar darnach in dem vier vnd achczikisten jar am nachsten Suntag nach sand Gyligen||
tag.

Source Fulltext: OÖUB 10 (Wien 1933), S. 270-273