Wir Albrecht von Gots gnaden herczog ze Österreich ze Steyr ze Kernden vnd ze Krayn graf ze Tyrol etc. bekennen vnd tun kunt, als wir an aim tail vnd der hochgeborn fürst herczog Albrecht von Payrn vnser swager an dem andern ainen hindergang getan haben von der mautt auf dem Schertenperg vnd der Puchaymer vnd andrer güter wegen, also haben wir vnserm getrewn lieben Reynprechten von Walsse haubtmann ob der Ens versprochen vnd gelobt, geschech, daz vns von desselben hindergangs wegen die vorgenant mautt oder güter abgesprochen würden, was vns denn also abgesprochen wurde, darczu sullen wir vnd der vorgenant vnser haubtman schikchen, die aigenlich scheczen, was der abgeng sey, vnd sullen denn darnach demselben von Walsse anderswo als uil gult, als die obgenanten gulte pracht habent, widerlegen, vnd sullen wir das tun inner zwain manöden ane verziehen. Mit vrchund dicz briefs, geben ze Wienn an Mentag vor sand Matheus tag des heiligen zwelifboten vnd ewangelisten nach Christes gepurd dreuczehen hundert iar darnach in dem vier vnd achczigisten iare. Dominus dux.

Source Fulltext: OÖUB 10 (Wien 1933), S. 277-278