Wir Heinrich der alt vnd wir Vlrich der jung sein sone grafen zue Schawnberg bekennen vnd vergehen offenlichen mit dem brife allen den, die in ansehen horen oder lesen, das wir mit wolbedachtem mute vnd nach vnserr freunde vnd rats rate vnser herrschaft vesten vnd slos mit namen Schawnberg das Newhaws auf der Tunaw gelegen Stauffe, vnsern markte vnd mautt Aschach vnd vnserr gericht genant das Swansergericht, das gericht in dem Aschacherwinkel vnd das gericht in dem Tunawtal, die ledig vnd vnuersaczt sein, item das gericht in dem Erleich Peurbach vesten vnd stat, die vnserm lieben aidem Jobsten herren zue Abensperg zweyr tausent pfunt Wienner pfenning für sein heiratgut von vns sten, item Eferding vesten vnd stat, die vnserm liben aidem Heinrichen herren zue Rosenberg tausent pfunt Wienner pfenning von vns für sein heiratgut sten, vnd vnser vesten Mistelbach, die Ekkarten dem Tänner von vns vmb virhundert pfunt pfenning versaczt ist, mit allen iren rechten eren nuczen gewonheiten vnd zuegehorungen, wie die genant sein, nichts ausgenomen, als di vnser vorfaren vnd wir vncz her gebracht haben, in getrews hant aufgeben vnd eingeantwurt haben, aufgeben vnd einantwurten die in kraft dicz brifes dem edlem wolgebornem Johansem dem jungen lantgrafen zum Leuthemberg vnd grafen zue Hals vnserm lieben aidem, vnd dem edlem Johansen herren zue Abensperg vnserm liben sweher, das sie die on alle vnser hindernusse beseczen vnd entseczen sullen vnd mugen, nach ir selbs notdurfft on geuerde, in der bescheiden, das sie vns vnd vnsern egenanten sone nach vnserr notdurfft getrewlichen besorgen sullen on alles geuerde. Wir bekennen auch, ob die egenant vnser lieber aidem vnd vnser lieber sweher von vnsern vnserr egenanten vesten sloss vnd gericht wegen, als oben begriffen ist, dheinerley kriege gewünnen vnd ichts auslegten verzerten oder schaden nemen, die redlichen vnd erbern leuten wissenlichen wem on geuerde, die sullen wir die egenanten grafe Heinrich vnd grafe Vlrich oder vnser erben in ausrichten vnd widerkern genczlichen vnd getrewlichen on alles geuerde. Auch bekennen wir, ob sie von vnsern vnd vnserr egenanten vesten sloss vnd gericht wegen dheinerley teiding teten, für vns versprechen oder sich verpinden mit brifen oder worten, das wir in das genczlichen stet vnd vnuerrukt sullen vnd wollen halden getreulichen on alles geuerde, vnd ob sie von der selben teiding verpundnuss brif oder worte wegen dheinerley schaden nemen, die redlichen vnd wissenlichen wern erbern leuten, die sullen wir auch genczlichen abtun vnd wider kern on geuerde. Vnd ob wir grafe Heinrich der alte von tods wegen abgingen, so sullen sie die egenanten vnserr slos alle, als oben geschriben stet, dem egenanten vnserm sone grafen Vlrichen oder seinen leiplichen elichen erben nicht antworten noch vbergeben, sie haben in dann vor alles das gehalden vnd ausgericht, das oben an dem brif geschriben ist, vnd das sie auch zue iren vernunftigen tagen komen sein. Doch wenn vnser egenant sone oder sein leiplich elich erben in alles das, das oben geschriben ist, genczlichen volfürt vnd aufgericht haben, so sullen sie vnserm sone oder seinen leiplichen elichen erben, als sie zue iren vernünftigen tagen komen sein, die egenanten vnserr slos vesten mautt vnd gericht, als die oben vnd hernach aigenlichen geschriben sein, on alle widerrede vnd hindernusse lediclichen widergeben vnd ein antwurten on geuerde. Vnd ob das wer, das wir grafe Heinrich der alte vnd wir grafe Vlrich der jung sein sone on leiplich elich erben von tods wegen abgingen, so wollen wir vnd schaffen in kraft dicz brifs, das die egenant vnserr grafschafft vnd herschafft vesten slos merkt mautt vnd gerichte mit allen iren zugehörungen manschafften lehen wiltpanen rechten eren nuczen gewonheiten, wie die genant sein, nichts ausgenomen vnd alle ander gut vnd habe, die wir yeczund haben oder furbas gewinnen mügen on geuerde auf lantgrafen Johansen zum Leuthemberg vnsern aidem vnd Johansen herren zue Abensperg vnsern liben sweher vnd auf ir beder leiplich erben geuallen zue erben, also das si die furbas mit einander gleich erben vnd teilen sullen vnd mugen on geuerde. Wer auch, das die egenant lantgraf Johans vns lieber aydem vnd Johans herre zue Abensperg vnser lieber sweher beide, in der zeit, vnd sie die egenant vnserr vesten sloss mautt vnd gerichte ynne hetten, vor vns von tods wegen abgingen, so sullen die egenanten vesten vnd slos, als die alle oben an dem brife geschriben sein, wider an vns vnsern egenanten sone oder vnserr leiplich erben geuallen vnd erben on geuerde, ausgenomen das wir die obgenanten versaczten slos bede vmb heiratgut vnd sust, dar umb sie versaczt sein, lösen sullen on geuerde. Wir geluben auch in guten trewen alle oben geschriben artikel von worten zu worten stete vnd vnuerrukt zue halden vnd zue volfüren on alles geuerde vnd darumb zue einem waren urkunde vnd einer pessern sicherhait geben wir den brife besigelt mit vnserr beider vnd hern Janen herren zue Rosemberg vnsers liben swehers, hern Heinrichs von Ströszna zue der zeit pflegers zum Maidstein vnd hern Reinharts von Czeschtlicz ritter des obgenanten vnsers swehers diener anhangenden insigeln, die sie nach vnserr pete willen zue einer geczeugnüsse in on schaden on geuerde an den brife zue vnserm vnd vnsers sons insigeln gehangen haben, der geben ist zue Chrumpnaw nach Cristi vnsers herren geburde dreyczehenhundert jare vnd darnach in dem sechs vnd achczigsten jare, an dem Suntag, so man singet Reminiscere miseracionum tuarum.

Source Fulltext: OÖUB 10 (Wien 1933), S. 366-369