Wir Johans der jung lantgraf zum Leuchtenberg vnd graf zue Hals bekennen offenlichen mit dem brif allen den, die in an sehen horen oder lesen, als die edlen wolgebornen grafe Heinrich vnser lieber sweher vnd graf Vlrich sein sone vnser lieber swager grafen zue Schawnberg ire vesten vnd slos mit namen Schawnberg das Newhaus Stauffe, den markte vnd mautt zue Aschach, ire gericht genant das Swanser gericht das gericht in dem Aschaher winkel vnd das gericht in dem Tunawtal, die ledig vnd vnuersaczt sein, das gericht in dem Erleich Peurbach vesten vnd stat, die vnserm liben swager Jobsten herren zue Abensperg von in vmb zweytausent pfuntWynner pfenning stein für sein heiratgut, item Eferding vesten vnd stat, die vnserm lieben oheim Heinrichen herren zue Rosemberg (vmb) tausent pfunt Wynner pfenning von in auch für sein heiratgut sten, vnd Mistelbach die vesten, die Ekharten dem Tanner (vmb) virhundert pfunt Wienner pfenning stet, mit allen iren rechten, eren, nuczen, gewonheiten vnd zugehorungen, wie die genant sein nichts ausgenomen, als die ir vorfaren vnd sie her gebracht haben, vns vnd vnserm lieben swager Johansen herren zue Abensperg in getrews hande aufgeben vnd eingeantwurt haben, als wir beide des ir brif haben, das wir die nach vnser selbs notdurfft on alle ir hindernusse beseczen vnd entsetzen sullen vnd mügen ongeuerde, also geluben wir in guten trewn vnserm egenanten swager von Abensperg, ob er von der egenanten vnsers swehers vnd seins sons vnsers swagers vnd irer egenanten vesten sloss mautt vnd gericht wegen dheinerley kriege gewünne, teidingt, sich verpünde mit brifen oder mit worten oder dheinerley zerung tete oder schaden neme, die redlichen vnd erben leuten wissenlich weren an geuerde, vnd was er von der selben herschafft vnd slosse wegen anhübe, das vnser beider notdurfft vnd nucz were vnd mit vnserr wissen geschech, on geuerde, das wir genczlichen mit sampt im daran sein wellen vnd sullen zue gewin vnd uerluste, vnd im auch darynne getrewlich helffen sullen vnd wellen, mit raten vnd taten, on alles geuerde. Vnd als vns vnd Johansen herren zue Abensperg vnserm liben swager die egenannten grafe Heinrich vnser sweher vnd grafe Vlrich sein sone vnser swager ire obgenannten herschafft slos vnd veste vnd alle ir habe vnd gute nach laute der brife, die wir darumb haben, geschafft vnd vermacht haben, das wir vnd der selb vnser swager von Abensperg oder vnser beider leiplich elich erben nach irem tode die furbas mit einander erben vnd teilen sullen vnd mügen, gelüben wir dem egenanten vnserm swager von Abensperg, ob er von tods wegen nicht sein sölte, dauor Got lang sey, das wir seinen erben getrewlichen geraten vnd beholffen wollen sein ongeuerde, das in ir teil an den egenanten vnsers swehers vnd swagers herschafft slossen vesten mautten vnd gerichten vnd aller anderer habe, wie die genant ist, die der egenant vnser sweher oder vnsser swager hinder in nach irem tode lassen, on alle hindernuss geualle vnd geantwrt werde on geuerde. Auch sullen vnd wollen wir die egenannten vesten slos mautt vnd gericht getreulichen mit dem egenannten vnserm swager Johansen von Abensperg halden on geuerde vnd sullen auch der dheins nicht beseczen noch entseczen on seinen guten willen in dheiner weise on geuerde. Vnd ob wir icht ambtleute auf die selben slos seczen würden, die selben sullen vns vnd vnserm egenannten swager von Abensperg zue vnsern beiden handen geloben zue warten getrewlichen ongeuerde. Wer auch, das wir on leiplich elich erben abgingen von tods wegen, so sullen vnser nechst erben, die von vnserm namen vnd wappen geborne sein, die egenannte herschafft Schawnberg vnd die andern slos vesten mautt vnd gericht, als oben geschriben stet, mit vnsern swegern von Abensperg geleich erben vnd teilen on geuerde. Wir geluben auch alle oben geschriben artikel von wort zue wort stete vnd vnuerukt zue halden vnd zue volfüren getrewlichen on alles geuerde. Zue vrkund geben wir dem egenannten Johansen von Abensperg den brif besigelten mit vnserm vnd der edlen hern Janen vnd hern Heinrichs herren zue Rosemberg anhangenden insigeln, die sie zue einer gezeugnuss an den brife zue dem vnsern gehangen haben in on schaden on geuerde. Geben zue Chrumpnaw nach Christi vnsers herren geburde dreyczehen hundert jare vnd in dem sechs vnd achczigstem jare am Suntag, so man singet Reminiscere.

Source Fulltext: OÖUB 10 (Wien 1933), S. 369-371