Ich Johanns von Abensperg vnd ich Hanns von Lichtenstain, des hochgeborn fürsten meins genadigen hern herczog AIbrecht in Österreich hofmaister, wekennen vnd tun kunt offenleich mit dem brief vmb alle stöcz vnd mishelvng, die sich verlauffen habent zwischen dem hochgeborn fürsten vnserm egenantem herrn von Österreich vnd graf Hainreich von Schawnberg sider der nahsten werichtung, daz wir dar umb ainmutig vber ain worden sein einer verrichtung in aller der weis, alz die punt vnd artikel lautent, die her nach an dem brief wegriffen sind. Von ersten sey wir vber ain worden vmb die vest zw dem Nuvenhaus, daz die ein nemen sollen lantgraf Hanns zw dem Lewtenberg der jünger vnd wir bayd Hanns von Abensperg vnd Hanns von Lichtenstain, vnd wenn wir nu dieselben vest alle drey haben mit an ander eingenomen, so sol ich Hanns von Lichtenstain in bayden dem lantgrafen vnd dem von Abensperg oder vnder in bayden ir ainem die ob genanten vest zu dem Niwenhavs enpfelhen vnd ein antwurten von meins egenanten herren von Österreich wegen vnd von dez von Schawnberg wegen, vnd sollen si mir darvmb versprechen, die selben vest auz ir gewalt nit ze geben vnd die inne ze halten vncz auf den auzspruch, der her nach geschoben stet, vnd wann derselb auzspruch dann geschicht, so sol man dem von Schawnberg die vest wider ein antwurten in sein gewalt vnd sollen auch die weil alle stroczen auf wazzer vnd auf lande sicher sein, daz dehain niwvng angriff noch auflewff die weil niht geschehen in dehainer weis. Auch sein wir vber ain worden, daz der egenant vnser herr von Österreich zu mir Hansen von Lichtenstain seinem hofmaister zwen der seinen geben sol, so sol dann der egenant von Schawnberg zw mir Hansen von Abensperg auch zwen geben vnd sullen danne wir bayde vnd auch die vier, die von bayden taylen zw vns gegeben werdent, vollen gewalt haben auzzesprechen vnd ze enden, also was wir sehs ervinden vnd sprechen, wie graf Hainreich von Schavnberg vnd sein son versorgen vnd versichern sullen vnserm herrn von Österreich, domit derselb vnser herr von Österreich vnd lant vnd lewt vnd auch der bischof vnd die stat zw Paczawe vnd ander lewt, die daz wazzer vnd daz lant arbeiten, hinfür vngewänleicher aufsetz newvng vnd auch alles vnrehts auf waczer vnd auf land entladen vnd vberhaben werden. Do pey sol ez weleiben vnd ob auch daz were, daz vnder vns spruchlewten ainer oder mer abgiengen oder vonander notdurft wegen pey dem auszspruch niht gesein möhten, so sol derselb tayl, an dem sy abgent, ander an die stat geben an geväre. Ob auch wir dieselben spruchlewt oder der maist tayl vnder vns nit vberain wurden, so sullen vnd mugen wir sehs zw ainem. obman nemen einen gemainen piderman, derselb obman sol dann aus sprechen vnd ende geben vnverzogenleich, vmb wiw vnd waz stuke wir stöczich werden, vnd sol auch vergewisset werden, waz derselb obman oder die spruchlewt sprechent, von der gewishait wegen, daz ez do bey genczleich weleib, alz oben geschriben stet. Wir sein auch vber ain worden, daz vmb her Zacheras den Hadrer vnd alle ander, die auf bayden taylen in dem krieg wegriffen vnd verdaht seind, diener vnd helfer oder wie die genant sind, niemant auz genomen an gevärde, auch gesten sol an vns sehsen vnd an dem obman, ob wir nit vber ain würden, alz oben geschriben stet. Darnach sein wir vber ain worden, daz alle brief, die vnser egenanter herr von Österreich vnd der von Schawnberg gen anander gegeben habent, pey irr kraft weleiben sullen vnd waz sich sider der nahsten rihtigung zuspruch gen anander auf payden taylen vergangen habent, daz sol genczleich an vns egenanten payden, dem von Abensperg vnd dem von Liechtenstain sten auzgenomen der andern stuk, die wir selb sehster vnd mit ainem obman auzrihten sullen vnd dar vber sprechen, alz oben geschriben stet. Ez sol auch der von Schawnberg die zeit vncz auf den auzspruch die mautt anderswa niendert ein nemen dann dacz Aschach, vnd sol sy auch nit anders nemen, denn als sy von alter her komen ist. Auch sein wir payd vber ain worden, daz der obgenant auzspruch vmb alle sache geschehen sol zwischen hinnen vnd der nahsten künftigen Pfhingten vnd sol geschehen zw Lincz in der stat vierzehen tag nach dem nahsten künftigen Ostertag, als vor geschriben stet, vnd ob auch die spruchlewt von bayden taylen iht mer sicherhait wedorften, des sol man in auf den auz spruch von payden taylen stat tun. Dar vber geloben wir lantgraf Hanns der jung vom Lewtenberg vnd ich Hanns von Abensperg vnd versprechen pey vnsern trewen an aydes stat zw dem obgenanten von Schawnberg vnd ich Hanns von Lichtenstain||
vnd ich Hainreich der Neitperger versprechen zw vnserm obgenanten herren von Österreich auch mit vnsern trewen an aydes stat, daz alles daz, daz an dem brief geschriben stet, auf den vorgenanten tag genczleich sol werden auzgesprochen versichert vnd volfürt. Were aber, daz dez nit geschehe, so sollen die oder der, dem die vest zw dem Niwenhavs enpfholhen vnd ein geantwurtt ist, dieselben vest auz der gewalt nit geben, ez sey dann vor genczleich auz gesprochen versichert vnd volfürt, waz an dem brief geschriben stet. Vnd dez zw vrkund vnd peczer sicherhait haben wir graf Hainreich von Schawnberg vnd lantgraf Hanns der junger vom Lewtenberg vnd der vorgenant Hanns von Lichtenstain vnd Reinprecht von Walse haubtman ob der Enns vnser aygen insigel gehengt an disen brief vnd wann wir Hanns von Abensperg vnd Hainreich der Neiperger vnseren jnsigel nit pey vns gehabt haben zw disem mal, so verpint wir vns ich Hainreich der Neitperger zw meinem obgenanten herren von Österreich vnd ich Hans von Abensperg zw dem obgenanten von Schavnberg vnder die obgenanten insigel, alles daz genczleich stet ze halten ze volfüren vnd ze enden, waz an dem brief geschriben stet an alles gevärd. Der geben ist ze Lincz am Svntag, alz man singt Oculi in der Vasten, nach Christus geburd driwzehen hvndert jar, darnach in dem sehs vnd achsigistem jar.

Source Fulltext: OÖUB 10 (Wien 1933), S. 371-374