Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etc. tun chunt, das wir vnserm getrewn lieben Eberhart von Chappell vnd Pernhart seinem sun von der getrewn dinst wegen, die vns getan hat derselb von Chappell vnd fürbas wol getun mag, die genad getan haben vnd tun auch wissentlich mit dem brief, das si daz lantgericht im Machlant, das von vns vnd vnsern vordern ir sacz ist, sollen innhaben nuczen vnd niezzen ir paider lebtag in sacz weis, als die brief lautten, die si darumb haben also, das wir noch vnser erben den vorgenanten sacz nicht lösen sullen noch mügen, die weil der obgenant Eberhart von Chappell oder Pernhart sein sun lebent. Wann si aber payd mit dem todt abgangen sind, so mügen wir oder vnser erben denselben sacz von iren erben, oder wer den sacz von iren wegen inn hett, losen nach lautt der vorgenanten brief,||
die si vber den sacz habent. Der lösung sullen si vns auch stat tun an verziehen, vnd an alles geuerd. Mit vrkunt dicz briefs geben ze Wienn an sant Michels tag nach Krists gepurd drewczehenhundert jar darnach in dem sechs vnd achczigistem jare.

Source Fulltext: OÖUB 10 (Wien 1933), S. 395-396