Wir graf Heinreich vnd wir graf Vlreich sein sun grafen zu Schawnberch bechennen vnd tun kunde offenbar mit dem brief für vns vnd für alle vnser eriben vnd nachkomen, daz wir angesehen haben die puntnüzze, so vnser lieber brueder vnd veter graf Vlreich säliger für sich vnd für sein eriben vnd nachkomen vor etlichen jaren verpunden vnd verbrieffet hat zu den hochgeporn fursten herczog Stephan dem eitern säligen vnd zu seinen sünen herczog Stephan herczog Fridreich vnd herczog Johannss alle von Gotes genadn pfallenczgrafen bej Rein vnd hertzogen in Beyern etc. nach der brief sag, die wir ze peder seit darüber haben. Von der selben puntnüzze wegen vnd auch von den genaden vnd hilffen, der wir yeczund vnd hinfür von vnsern obgenanten genädigen herren gewartvnd sein, verpinden wir vns nu gegen burtigleich mit chraft vnd macht dez gegenburtigen briefs zu den hochgeborn fürsten herczog Stephan herczog Fridreich vnd herczog Johanns geprüdern vnsern lieben genädigen herren zu allen iren eriben vnd nachkomen vnd zu iren landen mit allen vnsern geslozzen Schawnberch Newhaws Stauff Euerding Pewerbach Erlach vnd Mistelbach vnd mit allen vnsern herrscheften vnd gerichten, die wir yeczund haben oder noch gewinnen, ewichleichen, daz wir mit allem vnserm vermügen geslozzen vnd herscheften jr getrew helffer sullen vnd wellen sein wider aller mänichlich niemant ausgenomen trewlich an allez gevärde. Wär auch daz, ob vnser obgenant genädig herren wolten kriegen von vnsern egenanten slozzen, die sullen ir läwt, die si darin legent vnd schikchen, besarigen mit chost vnd mit andern sachen, vns vnd vnsern eriben an vnsern slozzen an allen schaden, trewlichen an allez gevär. Auch bechennen wir, daz wir verdachtlichen von vnserr notdurft wegen vnd durich trew vnd frewntschaft vnsern lieben sweher Johannss von Abensperch genomen haben zu ainem phleger vber die obgenante vnserr slozz vnd herscheft, der zu einer merern sicherhait der obuerschriben sach zu vns versprochen hat, den egenanten hochgeporn fürsten vnsern lieben genadigen herren mit sambt vns allez daz stat ze haben, daz an dem brief verschriben ist, trewlich an gevär. Wir vorgenant graf Vlreich ze Schawnberch bechennen auch mit dem brief, daz wir der obgenante (n) hochgeborn fürsten vnserr lieben genädigen herrn dienner vnd hofgesind worden sein, die weil wir leben mit allen vnsern slozzen vnd mit allem vnserm vermügen trewlich angevär wartund vnd diennet sein jn aller der mazze, als oben an dem brief geschriben ist. Auch veriehen wir mit dem brief, daz wir dheinen vnredlichen krieg noch angriff hanndeln noch für vns nemen nicht sullen an vnser obgenanten herren rat vnd heizzen. Vnd dez allez zu einer woren stäten vrchunde geben wir vnsern genädigen herren den brief versigelten mit vnsern anhangunden jnsigeln vnd zu einer merrern sicherhait der obuerschriben sache haben wir vnsern obgenanten sweher her Johannss von Abensperch mit vleizz gepeten, daz der sein jnsigel zu den vnsern an den brief gehengt hat. Vnder die jnsigel verpinden wir vns all vnuerschaidenlich mit vnsern trewn an aydes stat, den brif vnd alle die puntt vnd artikel, die darinne begriffen sind, stät ze haben volfuern vnd enden, waz an dem brief verschriben ist. Der brief ist geben an Montag nach sand Michelstag nach Christi gepurde drewczehen hundert jar vnd in dem sechs vnd achczkyistem jare.

Source Fulltext: OÖUB 10 (Wien 1933), S. 397-398