Wir der ganz rat der stat ze Enns, (wer) die zeit des rates gewesen sind, vergehen offenlich mit dem brief und tun kund allen den er fürkumpt, das wir nach rat gunst und gutem willen der elteren und der pesten purger aus der gemain ze Enns recht und redlich verlihen haben zu einem rechten chaufrecht, als chaufrechts recht ist in dem land ob der Enns, Hannsen dem Haizinger seiner hausfraun Elsbethen und allen iren erben sünne und töchtern von erbn zu erbn die mül gelegen zu Enns an der alten pruk, di da gehört zu unserm spital ze Enns, und haben in die verlihen mit allen ern nuzen und rechten, di darzu gehörnt wie die genant sind, versucht und unversucht in solicher beschaiden, das si, oder wer di obgenant mül nach in inne hat, unserm obgenanten spital ze Enns davon raichen und diennen sullen zu rechtem dienst alle jar järleich an sand Michelstag zwen und dreissik mezen dürrs korns und darzu alles das malter, das das obgenant spital bedarff, das sol man in an derselben mül gänzleich ausrichten und malen an alle maut und an alle vodrung und nicht mer an als gevär. Sie und all ir erben mügen auch mit dem obgenanten irem chaufrecht und mit iren rechten an der obgenanten mül allen iren frum wol schaffen versezen verkauffen machen und geben, wenn sie wellent, unverzigen des spitals rechten und vodrung. Es sol auch alle handlung allzeit geschehen mit der purger willen und wissen zu Enns und nach irem rat und mit unsers spitalmaisters hant. Wer auch das tan, das der egenant Hanns Haizinger oder sein erben die obgenante mül frömden läuten verchauffet und die nicht unser mitpurger weren, dieselben sullen mit ir selbs leibe darauf sizen sunder unser mitpurger und sullen di innehaben in allen den rechten, als oben an an dem brief geschriben stet, an als gevär und sol auch di mül fürbas an der purger willen und wissen nindert verchümert werden. Wir der ganz rat, wer di zeit rat ist ze Enns, sullen und wollen auch des obgenanten chaufrechts auf der obgenanten mül ir recht herrn und scherm sein, als chaufrechts recht ist in dem land ob der Enns an als gevär. Und wenn ein wandlung da geschiecht, wer denn aufert, der sol geben unserm spital ze Enns dreissik phening ze aufert, und wer abfert auch so vil und nicht mer. Wer aber, das di handlung von in mit icht übergriffen würd und nicht also gehandelt und volbracht würd, als oben an dem brief geschriben stet, wie sich das füget, so schullen sie von allen iren rechten seyn, di si haben sollen an der obgenanten mül an all ir widerred. Und das alles zu ainem steten waren urkund geben wir in den brief besigelt und wolbestät mit unser stat ze Enns grossen anhangunden insigel, der geben ist ze Enns nach Christi gepurd dreuzenhundert jar darnach in dem sechsundachtzigisten jar an sand Bartholomestag.

Source Fulltext: OÖUB 10 (Wien 1933), S. 391-393