Ich Nicla der Jud von Hofkirchen vergich mit dem brief fur mich vnd all mein erben, das ich dem durchlawhtigen hochgeporn fürsten meinem gnädigen herren herczog Albrechten herczog ze Österreich ze Steyr ze Chärnden ze Chrain grafen ze Tyrol etc. hab willichleich aufgeben mein rehts aygen das purgstal genant der Wasen in der Weygerwisen vnder Hofkirchen gelegen, das mein lehen vormaln von den Volkenstorffern ist gewesen vnd das ich mit in hab awsgewechselt vnd hab das von demselben meinem herren dem herczogen nu ze lehen emphangen, als der lehenbrief weist, den ich von ym darumb hab. Dauon gelob vnd verhaiss ich mit meinen trewn wissentleich, das ich vnd all mein erben vnd nachkomen dasselb purgstall sullen von demselben vnserm herren dem herczogen vnd von seinen erben vnd nachkomen nu fürbazzer ewichleich ze lehen haben vnd emphahen in lehens weis, als lehens vnd landes reht ist angeuär. Vnd als vns auch derselb vnser herr der herczog hat erlawbt vnd gegunnet auf dasselb purgstall ain gesezz ze pawn, wellen vnd sullen wir ym vnd den egenanten seinen erben vnd nachkomen da mit getrew gewertig vnd gehorsam sein in allen sachen, als lehensman iren herren pilleich vnd von reht schuldig vnd gepunden sind, vnd da wider nymmer getun in dhainen weg. Mit vrchund des briefs versigelt mit meinem aygen anhangunden insigel vnd mit der erbern Hawnolts des Rawtter vnd meins swagers Görgen des Chersperger insigeln, die der sach gezewg sind in an schaden. Geben nach Kristi gepurd drewczehen hundert jar, darnach in dem aht vnd achczigisten jar des nachsten Eritags nach sand Margrethen tag.

Source Fulltext: OÖUB 10 (Wien 1933), S. 500-501