Wir Albrecht von Gotes gnaden herczog ze Österreich ze Steyr ze Kernden vnd ze Krain graue ze Tyrol etc. bechennen vnd tun kunt offenleich mit dem brieue, als die ersamen in Got vnser sunderlieben Ott Layminger korherr vnd zu den zeiten vitztvm vnd das capitel gemainleich des stift ze Pazzaw von irs kriegs wegen, den si yeczunt fürent wider die stat ze Pazzaw, mit vns vormals beredt vnd getaidingt habent, daz wir in ze hilf, die weil derselb ir krieg weret, in der Ilczstat ze Pazzaw haben sullen fümf vnd sibenczig spiezz vnd fümfczig schüczen, also daz si zu gleicher weis auch als vil da haben, vnd auch nu von newen dingen mit vns vberain worden sint, was wir seid derselben vordern tayding her mer denn die egenant zal spiess vnd schüczen da wizzentlich gehabt haben, oder noch hinfür haben werden, mit irem willen vnd wissen mit zal, die si oder ir hauptleut vinden von desselben irs kriegs wegen, daz si das alles, was das nach rechter raytung vmb sold vnd vmb scheden bringen wirt, vns oder vnsern erben genczlich ausrichten sullen vnd wellen getrewleich an alles geuer. Vnd habent daruber an stat vnd in namen eins kunftigen bischofs vnd irs capitels gemainleich der stift ze Pazzaw vns vnd vnsern erben zu eim rechten phande in geantwurtt vnd geseczt ir vest vnd geslos zu Obernperg mit sampt der mautt daselbs vnd aller ander seiner zugehörunge. Was wir auch auf behuettung desselben geslosses von der zeit, als sich dieser ir krieg angehebt hat, ausgenomen den ersten manod, den wir in daran haben vorgeben vnd abgelassen, nv gelegt haben oder hinfür legen werden vntz auf die zeit, alz wir dasselb geslos in vnser gewalt vnd gewer nemen, das habent si vns vnd vnsern erben auch auf denselben satz geslagen, also daz wir vnd alle vnser erben das egenant geslos ze Obernperg mitsampt der mautt daselbs vnd allen andern seinen zugehörungen inne haben vnd niessen sullen an allen abslag der nutz, als lang vntz ein künftiger bischof oder das capitel ze Pazzaw vns der obgenanten stucken genczlich auzrichten vnd beczalen, als das alles der saczbrief, den vns das obgenant capitel darüber gegeben hat, völliklich beschaidet, daz wir darumb fur vns vnd alle vnser erben demselben capitel geloben wissentleich mit dem brief, wenn ain künftiger bischof oder daz capitel ze Pazzaw, ob die weil da nicht bischofs were, vns solich auzrichtung mit bezalung oder mit satzunge, als vor vnd hernach geschoben stet, getut, daz wir in denn desselben irs geslosses wider abtreten vnd yn daselbe geslos mit mautt vnd aller seiner zugehörung lediklich in ir gewalt wider antwurten sullen in aller der masse, als si vns das habent ingeantwurtt an alles geuer vnd an alle widerred vnd vercziehen. Darczu sullen auch wir oder vnser erben oder wer ye von unsern wegen das egenant geslos innhaben wirt, einem künftigen bischof vnd dem capitel ze Pazzaw vnd irn nachchomen an irer stift dasselb ir geslos, dieweil das in vnserr gewalt ist, offen haben zu iren notdurften wider allermeniklich, wenn in des durft beschicht, doch an vnsern merklichen schaden vngeuerlich. Es ist auch beredt, ob in des durft beschech, ir egenants geslos anderswa zu versetzen, oder ob ein bischof oder si das sust in irs gotzhauses gewalt bringen wolten, in welichen weg das were, daz si vns denne vmb die sumen, so wir denne darauff haben, mit phenningen auzrichten vnd beczalen sullen oder vns ander irs gotzhauses geslos güter gült vnd nücz in vnserm lande zu Österreich gelegen, was vns der denne nach satzes gewonhait dafur gepüret, setzen vnd in antwurtten sullen, in satzes weise innezehaben, als oben begriffen ist. Ob auch in dhainen künftigen zeiten ein bischof oder das capitel ze Pazzaw dasselbe geslos yemann verkauffen versetzen oder in ander wege verkumbern wolte, so sullent si vns das vor meniklichem anbieten vnd vns oder ob wir des nicht wolten ainen vnser vndertanen vnd gehorsamen lantherren oder landleut des vor meniklichem günnen vmb so uil guts vnd in der masse, als in ander leut darumb geben vnd tun wollen an alles geuer. Vnd wer denn, daz wir das darumb in solicher masse nicht aufnemen wolten, so mechten si das furbas verkumbern vnd damit handeln nach irem frumen. Auch sullen wir vollen gewalt haben, als si vns des gegunnet habent, daz wir vns mit dem egenanten geslosse setzen mügen, stille ze sitzen in dem egenanten krieg, vnd sullen si dawider nicht tun in dhain weis. Es ist auch getaidingt, als schier die losung beschicht, als vorbegriffen ist, so sullen si vns oder vnser erben den gegenwurtigen vnsern brief widergeben vnd ze gleicher weis sullen wir oder vnser erben dem vorgenanten bischof vnd capitel iren satzbrief, den si vns vber das vorgenant geslos ze Obernperg gegeben habent, widergeben vnd antwurten lediklich an alles vercziehen, wan dieselben brief hinfür denn gar tod vnd ab sein sullent. Vnd der vorgeschriben sache ze vrkund geben wir in den gegen wurtigen brief versigelten mit vnserm furstlichen insigel, der geben ist ze Ens an dem Suntage sand Anthonien tag nach Kristes gepurd drewczehen hundert jar dar nach in dem newn vnd achczgistem jare.

Source Fulltext: OÖUB 10 (Wien 1933), S. 528-530