Wir Ott Layminger korherr vnd zu den zeiten vicztum, vnd das capitel gemainleich der stift ze Pazzaw bechennen vnd tun kunt offenleich mit dem brief, als wir von vnsers krieges wegen, den wir yeczunt füren wider vnser stat ze Pazzaw, mit dem durchleuchtigen fürsten vnserm gnedigen lieben herren herczog Albrechten herczogen ze Österreich vormals beredt vnd getaidingt haben, daz derselb vnser herr vns ze hilff, dieweil derselb vnser krieg weret, in der Ilczstat ze Pazzaw haben sol fümf vnd sibenczig spiezz vnd fümfczig schüczen also, daz wir zu gleicher weis auch als vil da haben, sein wir nv von newen dingen nach guter vorbetrachtung mit demselben vnserm herren vberain worden, was er seid derselben vordern tayding her mer denn die egenanten zal spiezz vnd schüczen da wizzentleich gehabt hat odef noch hinfür haben wurde mit vnserm willen vnd wissen mit zal, die wir oder vnser hauptleut vinden, von desselben vnsers kriegs wegen, daz wir das alles, was das nach rechter raytung vmb sold vnd vmb scheden bringen wirt, vnserm egenanten herren oder seinen erben genczlich auzrichten sullen vnd wellen getrewlich an alles geuer. Vnd haben darumb nach zeitigem rate vnd mit wolbedachtem mute für vns vnd vnser nachkomen an stat vnd in namen eins künftigen bischofs vnd vnsers capitels gemainleich der stift ze Pazzaw dem egenanten vnserm herren herczog Albrechten vnd allen seinen erben zu eim rechten phande ingeantwurtt vnd geseczt vnd seczen auch wissentleich mit dem brief vnser vest vnd geslos zu Obernperg mitsampt der mautt daselbs vnd aller anderr seiner zugehörunge, wa die gelegen oder wie si genant sey. Was auch derselben vnser herr von Österreich auf behüttung desselben geslosses von der zeit, als sich diser vnser krieg angehebt hat, auzgenomen dem ersten manod, das er vns daran von seinen gnaden hat vorgeben vnd abgelassen, nv gelegt hat vnd noch hinfür legen wirt vncz auf die zeit, alz er das geslos in sein gewalt vnd gewer nimpt, das haben wir vnserm egenanten herren vnd seinen erben auch auf den egenanten sacz geslagen, also daz derselb vnser herr vnd all sein erben das obgenant geslos ze Obernperg mitsampt der mautt daselbs vnd allen andern seinen zugehörungen innehaben vnd messen sullen an allen abslag der nucze als lang, vncz ein künftiger bischof oder vnser capitel ze Pazzaw si der obgenanten stuken genczleich auzrichten vnd beczalen. Wenn auch ein künftiger bischof oder vnser capitel das getut, so sullen si vns desselben vnsers geslosses wider abtreten an alle widerred vnd vercziehen. Auch sullen vnser egenanter herr von Österreich vnd sein erben, oder wer von iren wegen vnser egenants geslos innehaben wirdt, vnserm künftigen bischof vns vnd vnsern nachchomen an vnserr stift dasselbe vnser geslos, dieweil si das in irer gewalt innehabent, offen haben zu vnsern notdurften wider allermeniklich, wenn vns des durft beschicht, doch an iren merklichen schaden vngeuerlich. Es ist auch beredt, ob vns durft geschech, vnser egenant geslos anderswa ze verseczen, oder ob ain bischof oder wir das sust in des goczhauses gewalt bringen wolten, in welichen weg das wer an geuer, daz wir denn vnser egenant herschaft ze Österreich vmb die summe, so si denne darauf hette, mit phenningen auzrichten vnd beczalen sullen oder ir ander vnsers goczhauses geslos guter gült vnd nücz in irem lande ze Österreich gelegen, was in der denne nach saczs gewonhait dafür gepürt, seczen vnd inantwurten sullen, in saczes weise innezehaben, als oben begriffen ist. Ob auch in dhainen kunftigen zeiten ein bischof oder vnser capitel ze Pazzaw dasselbe geslos yemann verkauffen verseczen oder in andern wegen verkumbern wolte, so sullen wir das des ersten vnser egenanten herschaft ze Österreich vor meniklich anbieten vnd ir, oder ob si des nicht wolt, ainem irer vndertanen vnd gehorsamen lantherren oder lantleuten des vor meniklich günnen vmb souil guts vnd in der masse, als vns ander leute darumb geben vnd tun wolten an alles geuer. Vnd wer denn, daz si das darumb vnd in solher masse nicht nemen wolten, so möchten wir es furbaz verkumbern vnd damit handeln nach vnserm frumen, wie wir wellen, an geuer. Auch gvnnen wir vnserm egenanten herren wlssentleich mit dem brief, daz er sich mit dem egenanten geslozze seczen mag, stille ze siczen in vnserm krieg, vnd sullen wir dawider nicht tun in dhain weis. Mit vrchund dicz briefs versigelten mit vnserm des egenanten Qtten des Layminger korherren vnd zu den zeiten vicztums vnd vnserm des capitels der obgenanten stift zu Pazzaw anhangunden insigeln, doch vns den korherren daselbs ze Pazzaw an vnsern sundern gütern, die vns gemainlich zu vnsern phründen oder vnser dhainen besunder angehörent, an schaden vngeuerlich. Geben ze Ens an Mentag vor sand Agnesen tag nach Kristes gepurd drewczehenhundert jar darnach in dem newn vnd achczgistem jare.

Source Fulltext: OÖUB 10 (Wien 1933), S. 531-533