Wir Albrecht etc. bekennen vnd tun kunt, das wir vnsern getrewn den burgern vnd leüten in vnserm markt ze Wolfsegk die gnad getan haben vnd tun auch wissentlich, daz sy nu fürbass daselbs ze Wolfsegk ewichlich alle wochen auf den Mantag einen freyn wochenmarkt haben sullen vnd mügent in aller der masse, als ander vnser stett vnd merkt ob der Enns gewonlichen wochenmarkt habent angeuerd. Wir haben in auch von besundern gnad vnd mit fürstlicher macht denselben vnsern markt ze Wolfsegk vnd den Purgperg daselbs, als weit der begriffet, vnd auch den egenanten wochenmarkt auf den Montag gefreyt vnd freyn auch gegenwurtichlich mit disem brief, also daz allermenichlich vnd yederman, wer da hin kumpt, vmb all erber sach vnd getat daselbs freyung haben vnd da sicher vnd frey sein sol vor all anuell vnd beswerung, doch also das yederman des ersten von vnserm phleger oder dem richtter daselbs seinen willen vnd vrlaub vmb solich sicherhait gewinne, als das anderswa in vnsern land in gefursten freyungen recht vnd gewonhait ist. Dauon gepieten wir vnsern lieben getrewn dem haubtman ob der Enns gegenwürtigen vnd künftigen allen herren rittern vnd knechten burgrafen phlegern richtern vnd auch all andern vnsern ambtleuten vnd vndertan, den diser brief geczaigt wirdt, vnd wellen ernstlichen, das si die egenanten vnser bürgern von Wolfsegk bey dem egenanten wochenmarkt vnd der freyung lassen beleiben vnd si von vnsern wegen auch vestichlich dabey schirm vnd halten, das in da wider von nyemand dhainer beswerung oder irrung geschech. Wer aber dawider tett, den wolten wir an all gnad an leib vnd gut swerlich daruber pessern, Mit vrkund etc. geben ze Enns an Freitag nach Goczleichnams tag anno etc. LXXXIX0.

Source Fulltext: OÖUB 10 (Wien 1933), S. 556-557