Ich Veyt vnd ich Onoffer vnd (ich) Joachim gebrüder dy Anhanger bechennen vnd veriechen offenbar an disem brif fur vns vnd vnser erben allen den, dy in ansechent oder hörnt lesen, das dy ersammen herren her Ott abt ze sand Petter ze Salczburg mit sambt der prior vnd der conuent da selbs durch vnserr dinst vnd ir besundern genaden willen das gut yn dem Wazzenprunn vnd was darzw gehoert ze holcz ze veld besuecht vnd vnbesuecht, wie das benant ist, mir benanten Veitten vnd Joachim vnd Onoffer vnd seinen czwain swnn Vicenczen vnd Tybolten ze leibgeding verliehen habent, also beschaidenleich, das wir all iar iärleich an dem leczten vnserr Frawn tag in dem Heribst da von dienen vnd raichen sullen sechs schilling wienner pfenning vnd sullen dy antwurten dem ammann ze Praytenaw an allen chrieg vnd abganch mit der beschaiden, ob des nicht beschaech, so sullen wir sechs schilling wienner pfenning vervallen sein ze wandel vnd gaeben wir den benanten dinst vnd das wandel dar nach nicht ynner sechs wochen, so sullen wir veruallen sein von allen den rechten, dy wir an dem benanten gut gehabt haben vnd sullen wir sy da mit allen iren frum schaffen lazzen vnd sullen sy daran von vns vngeirt beleiben; wir sullen awch all iar in ir stift chomen mit vns selben oder mit vnserm beret boten, wann vns der amman dy stift chunt twt, vnd wann wir, als wir benant seinn, abgenn vnd nymer seinn, so ist das benant gut dem benanten goczhaws wider ledig warden, also das chainer vnser frewnt noch nachoemmen darawf nicht ze sprechen sullen haben in chainerlay weis weder mit recht noch an recht geistleichs oder weltleichs. Es ist awch ze merchen, das wir das benant gut weder verchawffen noch versaczen sullen, weder an jwden noch an Christen an des benanten conventz willen. Vnd das yn das alles staet vnd vnzebrochen beleih, gib ich in benanter Veitt Onoffer vnd Joachim gebrüder dy Anhanger den brif versigelten mit vnser aller treyer anhangunden insigel vnd ze einer pezzorn sicherhait mit vnsers liebem bruder Pettern des Anhanger awch anhangunden insigel versigelten, der geben ist ze Salczburg an Gotesleichnam tag, do man zalt von Christes gepurt trewczechen hundert iar darnach in dem newn vnd achczikisten iar.

Source Fulltext: OÖUB 10 (Wien 1933), S. 555-556