Wir Jörg von Gotes gnaden bischoff zu Passaw, bekennen vnd tun kunt offenleich mit dem briefe allen den, die in sehent lesent oder hörent lesen, als die ersamen vnser lieben in Got Herman techant Ott Layminger vicztum vnd das capitel vnsrer stifft zu Passaw vnser vnd vnsers goczhauses geslos vnd herschafft cze Obernperg mitsampt aller seiner zugehorunge verseczt vnd ingeben habent dem durchleuchtigen hochgeporen fursten vnserm gnedigen lieben herren herczog Albrechten herczogen ze Österreich etc. vnd seinen erben in saczes rechten innezehaben vnd ze niessen nach lautt des saczbriefes, den sie im darvber geben habent, daz wir aigentlichen beweiset sein, vnd vns auch des kuntlichen eruaren haben mit voller warhait, daz die vorgenanten vnser techant vicztum vnd capitel dieselben saczung getan habent von redlicher vnd merklicher grosser notdurfft wegen vnd mit namen ze verkomend merer vnd verderbliche scheden vnsers goczhauses. Darczu hat vns auch vnser egenanter herr der herczog in gegenwurtikait ettlicher vnserr korherren rete manne vnd getrewen, die doczemale bey vns waren, mit redlicher erberer vnd getrewer rayttung aigenlich beweiset, das er zu vnsers goczhauses grosser notdurfft auf den egenanten sacz also mit wissen vnsers capitels auzgelegt vnd beczalt hat an bereitem gelte vierczehentausent phunt sibenhundert phunt vnd sechczig phunt wiener phenning ane ander merkliche grosse hilffe vnd vortail, so er in vnsers goczhauses kriege wieder die stat zu Passaw hat getan mit volk geczeuge zerunge vnd menigerlai furderung, die er vnserm goczhause darinn hat mitgetailt, mit namen, daz er in sein selbs swerem vnd grossem kosten durch vnsers capitels pete das egenant geslos in dem krieg einen ganczen manod oder mer behütt vnd inngehabt hat. Vber das alles er vns an der vorgenanten summe phenningen nach vnser pete vnd zu merer gnad vnd hilff vnser vnd vnsers goczhauss nu williclich abgelassen hat die siebenhundert vnd sechczig phunt, also beleibt dennoch summe des obgenanten gelts ym ze geltend vierczehentausent phunt wienner phenning. Da von so haben wir betracht die fürderliche hilff vnd schirm, so der egenant vnser lieber her vnserm stifft vormals vnd auch in disen leuffen hat getan, vnd haben dar vmb nach zeitigem rate vnserer rete vnd getrewen, die wir nu zemal bey vns heben gehebt, mit guter vorbetrachtung für vns vnd alle vnser nachkomen an vnserm bistum mit aller der ordenung vnd krafft, die nach geistlichem oder weltlichem rechten oder nach gewonhait der lande in dhaine weise darczu gehorent, denselben sacz vnd auch den obgenanten saczbrief, der darüber gegeben ist, vnserm obgenanten lieben herren herczog Albrechten herczogen ze Österreich etc. vnd allen seinen erben vernewt vnd bestett vnd vernewen vnd besteten auch wissentlich mit kraft des gegenwertigen briefs also, daz derselb vnser herr vnd alle seine erben das obgenant vnser geslos vnd die herschafft ze Obernperg mit allem dem, so dar zu gehört, vnd in allen den rechten, als vnser voruordern bischofe ze Passaw die herbracht habent, in ains rechten phandes rechten an allen abslag der nucze, die wir in lauterlich geben vnd ablassen, innehaben vnd niessen sullen vnd mügen, nach des obgenanten saczbriefs lautt als lang, vncz wir oder vnser nachkomen bischoff oder vnser capitel diselbe vnser geslos vnd herschafft von in erlösen mit vierczehentausent phunden wienner phenningen. Wenne auch domite wir oder vnser nachkomen oder vnser capitel losung an si vordern, so sullent si vns der gehorsam sein vnd statt tun, an alle widdered vnd vircziehen. Auch geben wir für uns vnd vnser nachkomen dem vorgenanten vnserm herren volles recht vnd ganczen gewalt, daz er vnd seine erben alle secze, wie die genant sein, die vormals auz derselben herschafft von vnsern voruordern verseczet sind, hin wider darczu an sich lösen mügen, in allem dem rechten, als wir selber tun möchten, vmb souil gelts, als sie stent, nach der saczbrief lautt, die vnser voruordern darüber gegeben habent, vnd was sie der also lösent vnd in ir gewalt bringent, die sullent sie auch zusampt dem gegenwertigen haubtsacz inne haben vnd niessen, vncz wir oder vnser nachkomen si des gelts, dar vmb si also gestanden habent, auch gerichten mitsampt den obgenanten vierczehentausent phunden. Doch behalten wir uns selber vollen gewalt, ob geschech, daz wir dieselben stuck zu vnser selbs gewalt vnd nucze vngeuerlich lösen wolten yeczunt von den, so sie nuczemal stent oder hinnach aus vnserer egenanten ||
herschafft von Österreich gewalt, ob si dar in koment, das man vns des allczeit stat tun sol an alle widderred vnd vercziehen. Wir geloben auch für vns vnd alle vnser nachkomen bischoff zu Passaw, daz wir den gegenwertigen saczbrief genczlich stet haben sullen vnd wellen vnd dar wider nymer tun noch trachten oder gehellend zu tund mit redden oder werchen, haimlich noch offenlich in dhaine weise, sunder daz wir dem vorgenanten vnserm herren vnd allen seinen erben sullen geholfen vnd bestendig sein nach vnserm vermügen, dasselb geslos mitsampt aller seiner zugehörung in irer gewalt vnd gewer zu behalten, schüczen vnd schirmen, vncz es redlich von in gelöset wirt nach des gegenwertigen satzbrief sag an all geuer. Auch sol vnser obgenanter herr vnd alle seine erben, oder wer von iren wegen das egenant geslos innhaben wirt, vns vnd vnsern nachkomen dasselb geslos, die weil das vnuerledigt in irer gewalt ist, zu vnsern vnd vnsers goczhauses notdurfft offen haben wider meniclich, wenn vns des durf ft geschieht doch an iren merklichen schaden vngeuerlich. Ob auch in dhainen kunftigen zeiten wir oder dhainer vnserer nachkomen das geslos vnd die herrschafft yemann virkauffen verseczen oder in dhain ander weg virkumbern wolte, so sol man das von erst vnser egenanten herschafft ze Österreich anpieten vnd ir oder ob si des nicht wolt ainem irer vndertanen vnd gehorsamen lantherren oder lantleut des vor meniklichem gunnen vmb souil guts vnd in der masse, als ander leut dar vmb geben vnd tun wolten an geuer. Vnd wer denn, daz sie das darumb in solicher mass nicht aufnemen wolten, so möchten wir es furbaz virkumbern vnd unsern vnd vnsers goczhauses frumen damit schaffen an alles geuer. Es ist auch getaidingt vnd beredt, als schier die losung geschieht, so vorgeschriben stet, so sol vns vnsern nachkomen oder vnserm capitel zu Passaw, ob die weil nit bischof da were, vnser vorgenanter herr von Österreich sein erben oder nachkomen den gegenwertigen saczbrief widergeben lediclichen. Vnd zu gleicher weiz sullen wir oder vnser nachkomen oder das vorgenant vnser capitel, ob die weil nit bischoffs war, dem obgenanten vnserm herren von Österreich seinen erben oder nachkomen iren gegenbrief der vorgeschriben sach auch widergeben vnd sullen auch denn zu baiden tailn der gegenwertig saczbrief vnd auch der gegenbrief gar ab vnd tod sein vnd fürbaz chain chrafft mer haben. Vnd dar vber zu vestem vrchund geben wir für vns vnd alle vnser nachkomen den gegenwertigen brief virsigelten mit vnserm anhangenden insigel, der geben ist ze Wienn an der heiligen Aindlef tausent Megde tag nach Kristes gepurd drewczehenhundert jar darnach in dem newn vnd achczgisten jar.

Source Fulltext: OÖUB 10 (Wien 1933), S. 572-576