Wyr Albrecht von Gotes genaden herczog ze Ossterreich ze Steir ze Kernden vnd ze Krain graff ze Tyrol etc. enbieten vnssern getrewn Mathessen dem Schüeler vnd Görigen dem Wispechen, vnsern amptlawten ze Gmvndn oder welich ye furbas vnsser amptläwt da werdent, vnsser gnad vnd alles gut. Vmb den gelt, den man vnsser stat ze Enns zu dem paw an di pruken daselbs von egenanten vnsserm ampt ze Gmvnden jerleich geraichet hat vnd den wir in niedergelegt haben, lassen wir ew wissen, daz wir den der egenanten vnsser stat nv wider ledig geschafft haben, davon enphelichen wir ew ernstleich vnd wellen, daz ir nv furbas denselben gelt von dem obgenantn vnsserm ampt alle jar hinfur darczu raichet vnd gebt zu gleicher weiss, als man den vormals darczu gegeben hat nach sag der brieff, di sy von vnssern voruodern darvber habent vncz an vns. Geben zu Wienn an sand Alexen tag anno domini millesimo trecentesimo nonagesimo.

Source Fulltext: OÖUB 10 (Wien 1933), S. 631-632