Wir Albrecht von Gotes gnaden herczog ze Österreich ze Steyr ze Kernden vnd ze Krain graue ze Tyrol etc. bechennen vnd tun kunt offenleich mit disem brief allen den, die in sehent lesent oder hoerent lesen nu und hinach, daz wir mit gutem rat vnd zeitiger vorbetrachtung durch frides vnd gemains nucz vnd auch gemachs willen vnser lande vnd herscheften vnd aller vnser vndertanen für vns vnd aller vnser erben vnd nachkoemen herczogen ze Oesterreiche verhaizzen vnd verlobt haben bey vnsern trewen vnd mit worte vnserr fürstlichen wirdikait, verhaizzen vnd verloben auch mit dem brief, daz wir dem erwirdigen vnserm lieben frewnt hern Joergen bischofen ze Pazzaw vnd allen seinen nachkoemen geholffen sein sullen vnd wellen fürderleich mit aller vnserr macht zu allen iren wirden rechten vnd frume wider aller menieglich nyeman auzgenomen, wenn in des not geschicht vnd wir von in geuordert vnd gemont werden, an alles verczichen, vnd daz wir in auch all vnser vesten offen haben sullen zu allen iren vnd irer herschafft kriegen vnd noeten an geuerd. Wer aber, daz yeman, der vns angehoerte, wider den vorgenanten bischof von Pazzaw oder sein n(achkoemen) oder wider die iren icht tete, darumb sullent si vns zu red seczen vnd sullen wir denne von dem vnsern mynn vnd recht tun nach gelegenheit der sache an gewerd. Wolt aber der vnser des wider sein, so sullen wir dem vorgenanten von Pazzaw oder seinen nachkomen auf denselben geholffen sein als lang, vncz er darumb gepezzert wirt. Vnd verpinden auch vesteclich zu den vorgeschribenn gelubden vnd dingen all vnser erben vnd nachkoemen ewiclich. Mit vrchund diez briefs, den wir darüber geben, besigelt mit vnserm anhangenden insigel, der geben ist ze Wienn am nachsten Suntag nach dem Prehem tag nach Kristes gepurd drewezehen hundert iar darnach in dem ains vnd newnczigisten jare.

Source Fulltext: OÖUB 11 (Wien 1983), S. 6-7