Ich Wolfgang vnd Kaspar prueder die Stainpekchen vnd mitsampt vns alle vnser geswistreyd vnd auch all vnser erben wier vergehen vnd tun chunt offenbar mit dem prief allen, den er fuerchumpt vnd getzaigt wiert, daz wier vnserm mayr vnd holden Weyglein an dem Popelhoff vnd seiner hausfrawn vnd allen iren erben dhain layd nicht mer tun sullen noch dhainen zuespruch hintz im vnd allen seinen erben nicht mer haben noch gewinnen sullen jn solher mazz, als wier emaln ainsten tan haben. Also sullen wier wider sew hinfur nymmer mer tun weder mit worten noch mit werchen, mit recht noch an recht in dhainerlay weis also beschaidenleich mit ausgenomen worten, daz wier an sew nicht mer sullen vadern noch pegeren noch suechen denn den rechten vnsern gewendleichen dienest vnd vadrung, die si vns alle iar dienen sullen vnd raihen nach des ersten priefs sag, den si von vns habent vmb daz chaufrecht. Derselb prief sol pey allen seinen chreften peleyben vnd vmb dhain andrew vngewendleiche sach vnd vadrung sullen wier sew hinfur nicht mer phrengen noch vahen noch hert haben, als vor ist geschehen. Darvmb versprechen wier in wissentleich mit dem brief mit vnsern trewn an aydes stat. Wär aber, daz wier daz yndert vberfueren vnd des nicht stät hielten, als oben an dem prief geschriben stet, wo wier denn mit in fuerchomen vnd sew mit vns, so habent sew recht vnd wier vnrecht vnd si habent gewunen vnd wier verlaren. Vnd das in das alles von vns stat vnd vntzebrochen peleyb, darvber so geben wier Weyglein am Popelhof seiner hawsfrawn vnd allen seinen erben den prief für vns vnd vnser erben ze eim stäten vnd waren vrchunt, der pesigelt ist mit vnser paider anhangunden insigeln. Der sach ist zewg durch vnser pet willen vnser lieber vetter Haintzel der Stainpekch mit seim jnsigel im an schaden. Der prief ist geben nach Christi gepurd vber drewtzehen hundert iar vnd darnach im drew vnd newntzgisten jar des Mittechens nach sant Florians tag.

Source Fulltext: OÖUB 11 (Wien 1983), S. 179-180