Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etc. bekennen für vns vnd all vnser erben, daz wir nach guter vorbetrachtunge vnd zeytigem rat vnserr ret vnd getrewen dem edeln vnserm sunder lieben Johansen von Abensperg durch sunder getrawn, so wir zu im haben, die herschafft burg vnd markt ze Obernperg vnd das vrbar vnd di mautt daselbs vnd was dar czu gehöret in bestandesweys empholhen vnd in geantwurtt haben vnd emphelhen im die auch wissentleich mit dem brief, mit allen eren wirden vnd rechten inn cze haben, alz vns die ist in geantwurtt worden vnd wir die vncz her inn gehabt haben, ausgenommen geistleicher vnd weltleicher lehen, die wir vns vorauz behalten, von den nechst vergangen Weinachten vier gancz iar nechst nacheinander künftigen, also daz er dieselben herschafft burg markt vrbar vnd mautt ze Obernperg leutt vnd güter vnd vndertanen, die darinn gesessen sint, mit gewönleich dinsten vnd rechten innhaben sol nach seinen trewn an all geuerd. Er sol auch dasselbs stetleich haben die gewönleichen burgsezzen torbertel wachter pogner zymerman vnd maurer vnd soll die auch alle iar vmb iren gewönleichen sold genczleich ausrichten. Vber das alles sol der egenant von Abensperg oder sein erben vns vnd vnsern erben die vorgeschriben vier iar alle iar vnd auf all geschieht dauon raichen vnd geben syben hundert phunt wienner phenning zu den vier Quatembern im iar all Quatember hundert vnd fümf vnd sybenczig phunt, anczeheben mit der ersten zalung zu der Quatember in der Vasten nechst vergangen. Es ist auch beredt worden, das Vlreich Stükchler, der yecz vnser mautter daselbs ze Obernperg ist, dieselben mautt für sich haben sol seine iar, als er die bestanden hat, gar auz; aber das gelt, daz er vns dauon geben solt, das sol er dem obgenanten von Abensperg alle iar genczleich ausrichten nach der bestantbrief lautt, die er von vns hat, vnd im damit vnd mit allen andern sachen gewertig vnd gehorsam sein. Wer auch, daz vnser öheim herczog Fridreich von Bayern mit vns oder vnsern erben kriegen wurde in der obgeschriben zeyt, so mag der obgenant von Abensperg vns oder vnsern erben die obgenant phleg wol auf sagen vnd aufgeben; aber wenn er das tun wil, das sol er vns oder vnser erben vor zwen gantz maned wissen lazzen, daz wir die nach vnserr notdürfft beseczen mügen an geuerd. Wan er vns auch die obgenant phleg auf sendet, als vor geschriben ist, so sol er all kost getraid vnd wein vnd allen geczeug vnd were, die er denn in den egenant purg und markt hat vnd man darin vindet, genczleich darinn lassen beleiben angeuer. Vnd was wir im dafür geben oder tun sullen, des sol er bey vnsern reten beleiben vnd sol vns dann auch ausrichten das gelt des bestandes nach gleicher raytung, als sich das an dem iar gepürt. Vnd sol vns denn der egenant von Abensperg oder sein erben, ob er nicht wer, die egenant herschafft burg vnd markt vnd oder vnsern erben in antwurtten trewleich vnd an alles geuerd. Er sol auch vns oder vnsern erben mit den obgenant purg vnd markt ze Obernperg vnd mit allen iren zugehörung gehorsam vnd gewertig sein vnd vns die offen halten, vns vnd die vnsern, die wir denn darzu schikchen mit vnsern briefen, darin vnd darauz ze lassen vnd darin ze enthalten zu aller vnserr notdurfft trewleich vnd ungeuerd, wie offt des durfft geschieht wider allermenkleich nyemant ausgenommen. Ob auch geschech, daz der vorgenant Johans von Abensperg ynner den obgenant vier iarn abgieng, dauor Got sey, so mügen vnd sullent sein erben dieselben phleg in allen den rechten, alz vor begriffen ist, nach im inn haben getrewleich vnd vngeuerleich, als lang vntz wir oder vnser erben die an si vordern oder aber si vns die aufsagen. Vnd wenn solich vordrung oder aufsagen geschieht, so sullen auch desselben von Abensperg erben vns die wider antwurtten an all widerred vnd vereziehen. Wer auch, daz der obgenant von Abensperg ynner den obgenanten vier iarn mit dem tod abgieng vnd daz sein erben vns oder vnsern erben die obgenant herschafft burg vnd markt wolten aufsagen, als vorgeschriben ist, das sullen si vns auch zwen gancz maned vor wissen lassen vnd sullen vns dann dieselb herschafft burg vnd markt trewleich vnd an alles geuer in antwurtten vnd darin lassen kost zeug were vnd vns auch vmb das gelt des bestandes ausrichten nach dem, alz sich dann an dem iar gepürt, in aller der mazze, als das der egenante von Abensperg tun solt vnd alz oben geschriben ist. Wenn auch die obgenanten vier iar verlauffen sint, wenn denn darnach wir oder vnser erben die obgenante herschafft burg vnd markt zu Obernperg an den vorgenanten von Abensperg oder sein erben vordern selber oder mit vnsern offen briefen, so sullent si vns der an alles vereziehen vnd widerred für sich wider abtretten vnd vns die wider in antwurtten getrewleich vnd an alles geuerde. Vnd des ze vrkund geben wir den brief versigelten mit vnserm anhangundem jnsigil, der geben ist ze Wienn an Freytag vor Pangracy nach Kristi gepurd drewczehen hundert iar vnd in dem drew vnd newnczigistem iare.

Source Fulltext: OÖUB 11 (Wien 1983), S. 180-182