Ich Hans der Puchär diezeit vogt zu Wels vergich vnd tun kund mit dem brief allen den, di den brief ansehent hornt oder lesent, daz fur mich chomen sind die erbern beschaiden weisen die burger zu Gmundn vnd habnt mich des geweisst mit guter chuntschafft vnd auch mit briefen, so Vlreich der Chramer saeligen vnd auch sein wirtinn gehabt habent, vber die erzwai gueter beidew genant in der Öd in Chirichhaymer pfarr, di sein herczogisch aygen gewesen sind vnd diselbengueter mit namen geschafft vnd geben hat zu dem Spital ze Gmunden mit allen ern rechten vnd nuczen, so dar zu gehört vnd von alter herchomen sind, vnd di selbn gueter hab ich in bestaet in allen den rechten, also der vogtay recht ist zu Wels. Vnd dez ze vrchund gib ich obgenanter Hans der Puchaer vogt zu Wels den brief versiglt mit meinem aygen anhangandem insigl mir vnd meinen erben an schaden, der geben ist nach Kristi gepurd drewczehenhundert iar vnd darnach in dem virvndnewnczikisten jar am Samstag var dem Pluemostertag.

Source Fulltext: OÖUB 11 (Wien 1983), S. 269