Honorabilibus dominis vniuersis ecclesiarum rectoribus tam judicibus officialibus nobilibus ceterisque Christi fidelibus, ad quos presentes littere peruenerint, judex et jurati in Welsa cum vniuersitate ciuium ibidem se ad queque beneplacita preparatos et pauperum preces humiles et deuotas. Exhibitores presentium, qui pro negotio hospitalis nostri ac infirmorum necessitate mittuntur ad colligendas elemosinas, vestre conmittimus caritati rogantes humiliter in domino et deuote, quatinus ob reuerentiam corporis Christi sancte Marie virginis sanctorumque Lawrentij Antonii Marie Magdalene et precipue sancte Elizabet, qui ibidem patroni existunt, benigne recipiatis et in suis necessitatibus et legationibus adiuuetis ipsos apud vestras plebes efficaciter promouentes propter eum, qui se in talibus recipi confitetur. Sed quia gracie ac indulgentie hospitali nostro a venerabilibus patribus legatis archiepiscopis et episcopis concesse ob pericula viarum ad diuersas partes sine graui jactura cum appendentibus sigillis deferri non possint, ne hac occasione nostri hospitalis personas dubitationis scrupulo suborto contingat subire laboris indebite dispendium uel grauamen, consilio honestorum fruentes summam indulgentie nobis a multis partibus traditam presenti carte fecimus annotari, videlicet a domino papa Alexandro centum dies criminalium, a domino Gregorio papa vndecim centum dies et quinquaginta dies de iniuncta penitentia, item a triginta octo archiepiscopis et episcopis omnibus vere penitentibus et confessis, qui dicto hospitali suas conferunt elemosinas, a quolibet quadraginta dies criminalium et octuaginta venialium iniuncte penitentie misericorditer in domino relaxantur. Ad hec etiam vota fracta, si ad ea redierint, offensiones patrum et matrum sine sanguinis effusione peccata oblita in domino misericorditer relaxantur. Promittimus etiam firmiter et precise, si ecclesie vestre pati aliquod incipiant detrimentum quod et ipsas in parrochia ciuitatis modis omnibus verbis et factis promouebimus habundanter, insuper omnes transmittentes pia subsidia caritatis pauperibus et egrotis in nostro decumbentibus hospitali omni bonorum operum, que in eadem fiunt, necnon vnius cottidiane misse, que singulis ibidem celebrantur diebus, cum omnibus bonis operibus, que per nostram parrochiam fideliter peraguntur in celebrationibus missarum in vigilijs jeiunijs orationibus et elemosinis dandis, integre fiunt participes et perfecte. Datum Welsse nostre ciuitatis sub sigillo anno domini millesimo tricentesimo nonagesimo quarto in vigilia sancti Lawrentij.

Source Fulltext: OÖUB 11 (Wien 1983), S. 315-316