Wir Wenczlaw von Gotes gnaden Romischer kunig, zu allen czeiten merer des Reichs vnd kunig zu Beheim embieten allen herren rittern vnd knechten, die do siczen zu Osterich oder wo sie siczen in des hochgebornen Albrechtes herczoges zu Osterich zu Steyern vnd zu Kerrenden etc. vnsers liben swager vnd fursten landen, vnser gnade vnd alles gut. Wir begeren von euch vmb die behaltnuss, so die edlen Caspar vnd Gundachker gebrüder von Starchenberg den edlen Heinrichen von Rosemberg mit vns in irer vesten Wiltperg getan haben, das ir jn das durch vnsern willen vorgebt vnd in mit wortten vnd mit werken in keinerleyweis dester veynter dorumb seit noch nymant von iren wegen vnd besorget sie des mit ewerm brief fur euch vnd ewer erben, sie vnd ire erben, wann wir yns mit vnserm prief vnd wortten vorgeben haben. Douon getrawen wir euch wol, ir vorczeicht vns sein nicht vnd gewert vns in den sachen. Geben zu Piesk vnder vnserm angedrucktem insigele nach Crists geburt dreyczenhundert jare, dornach in dem virvndnewnczigistem jare des nechsten Dinstags noch sand Bartholomes tage, vnsrer reiche des Behmischen in dem XXXII vnd des Romischen in dem XIX jaren.||
Ad mandatum domini regis Johannes Gamynensis electus cancellarius.

Source Fulltext: OÖUB 11 (Wien 1983), S. 319