Wir Hainrich von Rosenberg vnd all vnnser erben bekennen vnd thuen auch chundt öffentlich mit dem brieff allen den, die ien schent oder hörendt lesen, das vnß die edlen wolgebornen^a) vnsre lyb freundtschafft erzaigt vnd auffgethan, das sie vnß mit dem Römischen könig könig Wennzlau zu Pehamben zu vesst Wilperch freundtlich lassennt gelassen habent, so beloben wir inn wir vorgenanter Hainrich von Rosenberg vnd wir Wizenek von Gallen vnd Waytich vonn Grasselaw dyzeit purggraf ze Gaydstain vnd all vnser erben mit vnsern treuen an aydesstatt mit gesambter hant vnuerschaidenlich miteinander, ob das wer, das die obgenanten von Stahrenberg oder yemand von iren wegen ze schaden chäm von des in lassens vnd behaltnus wegen, was sy des schaden nemen, ob waer von des edlen fürsten dem herzogen zu Osterreich ier herrschafft oder vonn yemandt ander, wie sich das fuegt vnd auch wie der schadt mag gesein, was ier einer pey seinem threuen drumb gesprechen mag^b) vnd auch an alles recht, denselben Schaden allen schullen wir sein treulih an alles verziehen ausrichten vnd wider kehren an allen iren schaden vnd schullen sein daß haben das vns vnd vnsern treuen vnd darzu auff aller vnser haab, wo wir dy haben vnd wie die gennannt ist. Theten^c) wir das nicht, so geben wir in vollem gebalt, das sie vns vnd die vnsern sachen phenten aufhaben vnd auh vnß vnd der vnsern hab sich darumb vnderwinden vnd auch in zehalten als vil vnd als lang, vnz^d) das sie davon wechomen vnd ausgericht werdten all^e) ierer scheden ganz vnd gar vnd wer in deß geholffen ist, das sey mit redt oder mit werck. Das ist vnser guettlich wil vnd wort vnd schullen auch die in keinerley sach nit wider sein noch iemant vnsers wegen. Das^f) die redt vnd auch handelung^g) alls aber verschriben steet, vnversprochen vnd auch vnverkehrt weleib, darüber ze einer waren vessten stettignuß geben wir in den^h) brieff versigelt mit vnserm anhangendem insigeln. Das ist geschehen, do man zalt von Cristi geburdt dreizechenhundert jahr vnd darnach in dem viervndneunzigisten jahr des Suntagß vor sant Margrethentag.

Source Fulltext: OÖUB 11 (Wien 1983), S. 307-309