Ich Eberhart von Chapellen vergich vnd tun kont offenlich mit dem brif, vmb den hof in der Treffnikch gelegen in Gallnewnchiricher pharr mit seiner zugehörung, den Mert der Pücher Stephann dem Sweinpekchen ze kauffen geben hat, das derselb chauf vnd handel beschechen ist mit meiner hant willen vnd gunst vnd hab auch ich den obgenanten hof mit seiner zugehorung dem egenanten Stephann dem Sweinpekchen vnd allen seinen erben verliehen vnd leich in auch wissentlich mit dem brief, alz lehens vnd landesrecht ist in Österreich vnd auch also das aller handl von des egenanten hoffs wegen beschech mit lehenherren hant. Ich vnd mein erben sein auch des obgenanten hoffs ir herr vnd scherm, alz lehens vnd landes recht ist Österreich. Mit vrkund des brieffs versigelten mit meinem anhangundem insigl, geben an Freytag vor Phingsten, da man zalt von Kristi geburd drewezehen hundert jar darnach in dem virvndnewnczkisten jare.

Source Fulltext: OÖUB 11 (Wien 1983), S. 292-293