Ich Jorig von Waltsee vergich vnd tun chunt allen den, die den brief lesent oder horent lesen, die nu lebent vnd hernach chunftig sind, daz ich mit aller meiner erben guten willen vnd gunst mit wolbedachten mut vnd nach rat meiner nechsten vrewnt zu der zeit, da ich es wol getun macht, verchawft vnd ze chawffen geben han dem edlen herren hern Hannsen von Liechtenstain von Nycolspurg des hochgeboren fürsten herczog Albrechts ze Österreich etc. hofmaister vnd seinen erben meins rechten aigens die vesst Pernstain vnd daz Chappellchen darinne vnd daz haws auf dem Mozz, do das lanntgericht zugehoret, daz von dem bischoff vnd dem goczhaws ze Babenberg lechen ist vnd daz do get mitten auf den Piern durch die Chlaws für Chremsmünster vncz gen Wels an die Stainprukch vnd auf nach der Trawn für Lambach an den Stadel vncz an die dürren Lawttach vnd auf gen Chirichhaym vnd in den Viechtbannch vnd in den Gruenach vnd vber den Zitwey wider gen Chlaws, daz trifft zechen mail lannch vnd vier mail brayt, vnd alles daz, daz zu der vorgenanten vesst Pernstain vnd dem haws auf dem Mos vnd dem lanntgericht daselbs gehoret, es sey manschaft ritterlehen pewttellehen chirichlechen kapellechen alterlechen vogtey eribuogtey traidgult phenninggult kesgult huenergult aiergult gericht stockh vnd galgen behawsts gut vberlend holczer weld wayd wismad ekcher vischbaid zechent zechenthewser hoff mayerhöff huben schennkchhawser weingerten pawngerten aigen lechen purgrecht pergrecht in vrbar ze holcz ze ueld vnd ze dorff, es sey gestift oder vngestift versuecht oder vnuersuecht, wie so daz genant oder wo daz gelegen ist alles inbeslossen vnd nichts ausgenomen, vnd besunder die vogtay des goczhaws ze Slirbach vnd aller der gult vnd güter vnd aller chirchen vnd chirchenlechen, die darzu gehörent, an alle ausczug vnd die vogtey des markchts vnd der chirchen ze Kirichdorff mit aller zugehorung vnd auch die vogtay der pharrchirchen ze Wartperg mit ir zugehorung. Die vorgenante vest Pernstain vnd das haws auf dem Mos mit dem lanntgericht vnd alle die gult vnd güter, die dorczu gehörent, als vorbenant ist, han ich dem egenanten hern Hannsen von Liechtenstain vnd seinen erben recht vnd redleich verchawft vnd geben mit allen den nutzen eren vnd rechten vnd zugehorung, als es mich von meinem vater hern Ewerharten von Wallsee seeligen angeerbt vnd angeuallen ist vnd als ich vnd derselb mein vater daz innegehabt haben vnd als ich daz aigen in aigens gewer, daz lehen in lechens gewer, daz purkchrecht in purgrechts gewer vnd daz pergrecht in perkchrechts gewer herpracht han vnd als es alles mit alter herchomen ist, vmb siben tawsent phunt vnd vmb zwaihundert phunt Wienner phennig, der mich der vorgenante her Hanns von Liechtenstain gancz vnd gar verrichtet vnd gewert hat, also daz er vnd sein erben sullen fürbas die vorgenante vesst Pernstain vnd daz haws auf dem Mos mitsambt dem lanntgericht vnd alles daz, das dorczu gehöret, so vorbenant ist, mit allen den nutzen eren vnd rechten, als vorgeschriben stet, ledigleich vnd vreyleich haben vnd allen iren frumen damite ze schaffen verchawffen versetzen machen vnd geben, wem si wellen, vnd alles daz damite tun vnd wanndeln, daz in allerpest füegt oder wol geuellet an allen chrieg vnd irsal. Vnd durch pezzer sicherhait so secz ich mich obgenant Jorig von Waltsee mitsambt allen meinen erben onuerschaidenleich vber die vorgenant vestt Pernstain vnd vber daz haws auf dem Mos vnd vber alle die gult vnd güter, die darczu gehorent, als sie vor an dem brief benant vnd verschriben sind mit aller zugehorung vnd mit allen den nutzen eren vnd rechten, als vorbenant ist, dem egenanten hern Hannsen von Liechtenstain vnd seinen erben ze rechtem gewern vnd scherm für alle ansprach vber daz aigen, als aigens recht ist, vber daz lechen, als lechens recht ist, vber das purkrecht, als purgrechts recht ist vnd vber das pergrecht, als pergrechtsrecht ist vnd des lanndes recht ze Österreich vnd ob der Enns. Wer awer, daz in fürbas an derselben vestt vnd haws vnd swas dorczu gehöret, so vorbenant ist, mit recht icht abging oder ob in mit recht icht chriegs oder ansprach doran auferstund, von wem daz wer, swas si des schaden nement, daz sullen wir in alles ausrichten vnd widercheren an allen iren schaden, vnd sullen auch si daz haben auf vns vnd auf allem vnsern gut, daz wir haben in dem lannde ze Österreich oder wo wir es haben, wie daz genant oder wo daz gelegen ist, wir sein lebentig oder tod. Vnd daz (der) verchawf fürbas also stet vnd vnczerbrochen beleib, dorüber so gib ich obgenant Jörg von Waltsee für mich vnd für alle mein erben dem vorgenanten hern Hannsen von Liechtenstain vnd seinen erben den brief ze ainem waren vrchund der sach versigelten mit meinem angehangen insigil vnd mit meiner lieben vettern insigiln der erbern herren hern Hainrichs von Waltsee, Herrn Rudolffs diezeit lanntmarchalich in Österreich, hern Reinprechts von Waltsee, diezeit hawbtman ob der Enns, vnd Vlreichs von Waltsee vnd mit des erbern herren insigil hern Albers von Ottenstain, dizeit hofrichter in Österreich, die der sach zewger sind mit iren angehangen insigiln demselben hofrichter an schaden. Der brief ist geben ze Wienn nach Christi gepurd drewczehenhundert jar darnach in dem viervndnewnzigistem jare des nechsten Vreytags noch sand Johannstag ze Sonnbenten.

Source Fulltext: OÖUB 11 (Wien 1983), S. 300-303