Wir Albrecht von Gottes genaden herzog ze Österreich zu Steir zu Kherndten vnd zu Khrain grave zu Tyroll etc. bekhennen für vnns vnd vnnser erben, als vnnser leit zu Haag yeczundt mit leib vnnd guet aus demselben markht varendt vnnd sich vnnder unnser vest zu Starhemberg ziehent vnnd auch da fürbas heuslich sizen vnnd ainen markht von neuen dingen daselbst stifften vnnd bauen wellent, haben wier denselben vnnsern leuten zu dem ehegenanten vnnsern markht vnnder Starhenberg von sondern gnaden vnnd auch von fürstlicher macht die gnadt gethann vnnd thuen auch mit disem brieff, das sy vnnd ire erben vnnd nachkhumen nun fürbas jerlich ainen ewigen jarmarkt daselbs auf sandt Veitstag haben sollen vnnd mügen mit allen den rechten freyhaiten gnaden vnnd gueten gewonhaiten, die annder unnser stet vnnd märkht ob der Ennß zu ieren iarmärkhten habent, vnnd das auch jedermann mit seiner hab vnnd khaufmannschaft zu demselben jarmarkht sicher wanndl vnnd arbait. Dauon gebieten wir unnsern haubtleithen ob der Ennß, wer der ie wierdt gegenwiertigen vnnd khunfftigen, allen herrn rittern vnnd knechten pflegern burggrafen richtern mauttnern vnnd zollnern vnnd andern unnsern ambtleithen vnnd vnnderthanen vnnd getreuen, den diser brief gezaigt wierdt vnnd sonderlich vnnsern pflegern vnnd burggrafen daselbs zu Starhenberg, wer der je den ist, vnnd wollen ernstlich, das sy dieselben vnnser bürger vnd leut in dem ehgenanten markht vnnder Starhenberg dabei lassen beleiben sunder sy auch festliglich dabey schiermen vnnd halten von vnnsern wegen vnnd nicht gestalten, das in yemand dhainen gwalt oder vurcht daran icht thue. Das mainen wier ernnstlich. Mit vrkhund ditz briefs geben zu Steir am Sambstag nach sanndt Michelstag nach Christi gebuert dreizehnhundert darnach in dem vierundneunzigisten jar.

Source Fulltext: OÖUB 11 (Wien 1983), S. 332