Ich Hainreich Stainpekch vergich für mich vnd all mein erben vnd tun kvnt offenlich mit dem brif vmb das gut ze den Laynern vnd ein gut genant das Fastuch ein gut ze Reysach vnd ain hof genant der Toblhof vnd sind alle gelegen in Arter pharr vnd in Schardinger gericht, die vnser rechts freys aigen sind vnd ist zwelif schilling gelts, haben wir aus den selben zwelif schilling phening gelts ain halb phunt gelts ze lehen genomen vnd nemen auch das wissentlich mit dem brief von dem edlen vnßerm genedigen herren hern Eberharten von Kappellen vnd von allen seinen erben, also dacz er dasselb halb phumt phenning gelts vnd sein erben wol hinfür geleichen mügen, wenn es ze schulden kombt vnd in ledig wirt recht als andre seine lehen vnd sullen si darinen chain irrung von uns nicht haben in dhainerlay weizz. Wär aber, das yn an der obgenanten lehenschaft des halben phunt phenning gelts icht abging, wy sich das fügt, das sullen si haben dacz vns vnd allem anderm vnßerm gut, es sey aigen lehen oder purkchrecht, wy so das genant ist, des nichts ausgeczogen vnd sew selb derselben hab alsuil vnderwinden vnd in anttwurten, damit er seins abgangs, so im an dem obgenanten halben phunt phenning gelts irr lehen wider bekennen an all ir schaden. Mit vrkund des brieffs versigelten mit meinen anhangunden insigel vnddes ist geczeug der erber Niclas Pawngartner mit seinem anhangenden insigel im an schaden. Geben an der aindleftawsnt mayd tag, da man zalt von Christi geburd drewezehen hundert iar darnach in dem virvndnewnczkisten jar.

Source Fulltext: OÖUB 11 (Wien 1983), S 335