Ich Hanns von Liechtenstain von Nicolspurg ich Hertneyds von Liechtenstain sein brueder, ich Kristoff von Liechtenstain ir vetter, ich Mathes ich Hanns ich Hainrich gebrüder von Liechtenstain, der vorgenanten von Liechtenstain vettern, bekennen vnd tun kund of fenleich mit dem brieff allermeniklichen gegenwürtigen vnd künftigen für vns vnd allvnser erben vnd nachkommen vnd sunderlich für Henslein vnd Hertlein von Liechtenstain meins egenanten Hertnyds sün, die noch nicht zu iren vollen jaren komen sind vnd für die wir vns wissentlich annemen, von der vngnad wegen, so die hochgeboren fürsten vnser gnedigen herren herczog Albrecht der eltter herczog Wilhalm herczog Leuppold sein vettern vnd herczog Albrecht der jung, des egenanten herczog Albrecht sun, herczogenn ze Österreich von irselbs irr vettern irer land vnd leutt wegen hincz vns vncz her habent gehabt vnd darumb sy vns auch mit vnserm leib zu iern handen genomen vnd geuangen habent vnd darumb ich auch obgenanter Mathes von Liechtenstain in derselben meiner herschaft vngnad komen vnd gewesen byn, darumb wir aber nu mit in genczlich sein verricht vnd uberain warden, vnd als vns dieselben vnser herren von Österreich yecz von iren sundern gnaden habent widergegeben dise nachgeschriben geslos vnd vesten: des ersten die herschaft stat vnd vest Velsperg mit irer zugehörung, item Rabenspurg die vest, item Ringleinstorff die vest, item die vest Mistelbach, item die uest Vlreichskirichen mit allen zugehorungen, item die zwai vest Ebelsperg vnd Riedegk mit iren zugehorungen, als die von dem gotshaus ze Passaw an mich vorgenanten Hansen von Liechtenstain komen sind, vnd auch all ander gueter, wa die enhalb der Tunnaw gelegen oder wie die genant sind, nichts ausgenomen vnd die wir vncz her haben ingehabt nach sag der brief, die vns darüber gegeben sind, das wir all vnd vnser yegleicher besunder verhaissen vnd gelobt haben, geloben vnd verhaissen auch wissentlich mit krafft dicz briefs bey vnsern treun vnd ayden, die wir darumb leibleich zu den heiligen haben gesworen mit ausgerakchten vingern vnd gelerten worten, das wir denselben vnseren herren von Österreich vnd iren erben vnd nachkomen mit den egenanten vnsern herschaften vesten geslossen merkten dorffern leutten vnd guettern in iren landen gelegen allczeit wellen vnd sullen getreu gewertig gehorsam vnd bestendig sein als vnsern rechten natürleichen herren. Diese vnser herren vnd ir erben sullen auch auff denselben vnsern herschafften stetten geslossen merkchten dorffern leutten vnd güetern all vodrung aufseczen vnd andere gewanheit haben vnd die dauon nemen als von andrer herren güetter in irem land zu Osterreich gelegen vnd auch darin ze enthalten, wenn vnd wie offt in des nott geschiecht, doch an vnsern merkleichen schaden. Auch geloben vnd verpinden wir vns in dem namen als dauor, das wir allermenikleich in vnser egenanten herren von Österreich landen gesessen, es sein praeletten pfaffen geystliche oder weltliche herren ritter vnd chnecht purger edel vnedl kristen oder juden, die nu fürbasser hincz vns allen oder vnser yegleicher besunder ze sprechen habent oder gewunnen, es sey vmb erb aygen lehen purgrecht oder pergrecht geltschuld oder varund hab, das yn der egenant vnser herren von Osterreich oder iren lantmarschalich oder irem anwalt, den sy darczu schaffent, oder an anderen stetten in iren landen, da das dann zerecht gepürt, ze verantwurten des rechtens sullen vnd wellen gehorsam sein vnd vns da verantwurten an alle widerred waygrung vnd vercziechung, als ander herren in iren landen des schuldig sein zetun an alles geuerd. Vnd des zu vrkund der warhait geben wir disen brieff versigelten mit vnser vorgenanten von Liechtenstain aller sechs insigeln, der geben ist ze Wyenn an sand Dorotheen tag anno etc. LXXXXV°.

Source Fulltext: OÖUB 11 (Wien 1983), S. 366-368