Ich Georg Harrocher seligen sun vergich für mich vnd für all mein erben offenleich mit dem brief vnd tun chund vmb meins egenanten vater Hanseins Harrocher insigel, das mein vater Albrecht der Harocher dem erbern rat der purger ze der Freinstat verpetschat ze behalten geben hat in ier kisten, wann dasselb insigel habent si vns dieselben erber purger erberichleich vnd redleich in aller der weis, als es in ingeantwurtt ist worden, also habent si vnss herwider geantwurtt vnd geben vnd sagen sev auch darumb gancz vnd gar lautterleich ledig vnd loz in der beschaiden, daz si vnd die stat ze der Freistat von vns vnsern erben vnd frewnten von der sach wegen hinfür dhainerlai ansprach zuspruch noch vordrung nymmer mer gehaben sullen noch wellen weder mit recht noch an recht noch in dhainer weis. Daz loben wier mit vnserm trewen an geuer stet ze haben. Vnd darüber zu ainem steten vnd warn vrkunde gib ich obgenanter Georg Harrocher für mich vnd für all mein erben vnd freunt den brief besigilten mit meinem aigen anhangunden insigel. Auch sind der sach zewgen durch mein fleissigen pet willen mein lieber veter Hanns von Aw vnd mein lieber stewfuater Erasem der Waizmanstorffer auch mit ier paider anhangunden insigeln in vnd ieren erben an schaden. Geben am Erichtag in den Osterveyrtagen nach Christes gepurd drewzehenhundert jar vnd darnach im fumfvndnewnzkisten jare.

Source Fulltext: OÖUB 11 (Wien 1983), S. 396-397