Ich Symon di zeit pfarrer zu Gaylspach vergich für mich vnd mein nachchomen vnd tuen chund offenlich mit dem brif etc. das jch mit willen vnd rät meiner chirichern mit vogtt vnd herrn hant ze rechtem erib zu chauffen geben han Hansen dem Spätner dy zeit gesessen auf dem Mayrhaushof gelegen zu Praytprvnn Heresinger pfarr seiner hawsfrau vnd jren erben vmb ain gelt, des jch zu meiner chirchen gancz vnd gar gericht vnd gewert pin, der selb hof halb mein vnd meiner chirichen rechcz aygen ist. Den selben halben hof mit seiner zugehörung vnd (was) zu ym halbem durich recht gehört mit allen ern rechten vnd nuczen, so (man) von ym halben wechomen mag, hab jch yn geben vnd in geantwurtt aus meiner nucz vnd gewer in soliher weschayden, das sew vnd ir eriben mir vnd meinen nachomen von dem halben hof all jar rayhen vnd dyennen schullen aynn mutt chorn vnd ainn meczen waycz vnd 16 meczen habern in rechtter lantmass vnd für ein swein 4½ ß w ~d vnd 60 ayr zwen chäs yden für 2 ~d zway hven vnd 1 gans als zu vnser Frawn(tag) der dinst(zeit) vnd nicht mer chaynerlay vodrung. Geben sy vns des dinstcz nicht zu dem wenanten tag, so gent ye vber 14 tag darnach 60 ~d zu wandl darauf, gebent sy den dinst vnd dy wandel nicht in sex wochen, so habent sy jr eribrecht auf dem vorgenanten halben (hof) verloren vnd der ist mir vnd meinen nachomen vnd vorgenanten meiner chirichen ledichlich verfallen auf gnad. Sy mögen auch jr eribrecht auf dem vorgenanten halben hof gein jren genossen wol verseczen (vnd) verchauffen mit meinem vnd meiner nachomen vnd der chirichen vogtt willen. Wie sich das vorgenant gut verwandelt, wer dann abfert, der geit (mir) oder meinen nachchomen 60 alter winer ~d, wer auf vert als vil vnd nicht mer. Ich pin auch des vorgenanten eribrechcz jr her vnd geber, wo jn den not vnd turft geschiecht, als eribrechcz recht ist in dem lant ob der Enns. Das in das also stat vnd vnuerchert weleib, darvber gib jch vorgenanter Symon pfarrer zu Gailspach in den brif versigelt mit meinem anhangvndem sygl zu einer zevgniss mit meines liben herrn Haynrich des Gaimans auch anhanngvndem sigl, der das an den brif gehanngen hat durch meiner vleyssigen gepet willen, jm vnd all seinen erben an schaden, wann er des vorgenanten gutz nw ze mal rechtter vogtt ist. Datum XIII hvnndert LXXXVI jar des Freytags vor sand Gregori in der heyligen Vasstten.

Source Fulltext: OÖUB 11 (Wien 1983), S. 490-491