Wir Wilhelm vnd Albrecht geuettern etc. bekennen, daz wir vnserm getrewn Paulen dem Kramer vnserm burger von Wells durch der trewn vnd frumkait willen, die wir an jm empfunden haben, vnd auch nach ratt vnser rete vnser ampt cze Gmunden mit sampt dem salczsyeden an der Hallstatt vnd dem Yschenland genczlich empfolhen haben vnd empfelhen jm auch die wissentlich mit krafft dicz briefs nu fürbasser mit allen gewelten eren wirden nuczen gulten diensten zinnsen vnd allen andern zugehören vnd gewonhaiten, als das ist vor herkomen vnd als die vnser vordern amptlewt Mathes der Schuler vnd Jörg der Wispek vnd auch darnach Fridreich der Krafft jnnegehabt habent, an vnser statt jnne ze haben, auszerichten vnd jn allen sachen getrewlich zu verwesen vnd ze versorgen nach vnssern nottdurfften, vnd vnserm obristen amptman zu vnssern handen dauon ze raichen vnd ze geben alles das gelt, so dauon geuellet, vnd vns auch jericlich dauon erbere vnd redliche rayttung ze tun, als sittlich vnd gewonlich ist. Er sol vnd mag auch alle amptleutt darinne seczen vnd entsetzen, wie jn ye nach seinen trewn dunket, daz vns des ain nottdurfft sey. Darczu sol er auch ander vnsser leutt vnd vndertanen daselbs getrewleich verantwurtten vnd beschirmen vor allem gewalt vnd vnrechten vnd jm die vnd alle vorgenanten stukch getrewlich lassen empfolhen sein, als wir jm des sunderlich getrawn, doch vncz an vnser widerruffen, ane geuer. Dauon gebietten wir vesticlich vnsern lieben getrewn allen vnsern amptleuten vndertanen vnd getrewn, die zu vnsern vorgenanten ampten ze Gmunden vnd an der Hallstatt vnd auch zu dem Jschenland gehörent, den diser brief geczaigt wirdt, vnd wellen ernstlich, daz sy demselben Paulen dem Kramer jn den vorgenanten vnd allen andern sachen getrewlich vnd genczlich gehorsam gewerttig geraten vnd beigestendig sein als vnsserm amptman zu vnssern handen ane all widerred vnd geuer vnd als wir jn des getrawn; daran tund sy genczlich vnsern willen vncz an vnser widerruffen, als dauor ist geschriben. Mit vrkund etc. Anno etc. Wienn Sabbats ante Gregorij LXXXXmo VI.

Source Fulltext: OÖUB 11 (Wien 1983), S. 491-492