Ich Eberhart von Kapellen vergich vnd tun kunt offenlich mit dem brief vmb di zway güter auf dem Freydangshof vnd in der awssern Chrinn mit irer zugehörung gelegen ze nachst dem markcht ze Czell in derselben pharr ze Czell, dy Elspeten Hansen des Ezelhofer wytib leybgeding gewesen sind vnd dy sy Jorigen dem Tanpekchen vnd sein erben ze chauffen geben hat, daz derselb chauf vnd handel beschechen ist mit meiner hant willen vnd gunst. Darzu hab ich von genaden dem egenannten Jorigen dem Tanpekchen vnd allen seinen erben verlihen vnd leich in auch mit dem brief, swaz mir oder mein erben wer ledig warden an den obgenanten gütern, swann di egenante Elspet mit dem tod abgangen wer. Es sol auch hinfur aller handl von der egenanten guter wegen beschehen mit lehen herren hant vnd dem ze vrkund gib ich in den brief versigelt mit meinem anhangundem insigel. Der brief ist geben do man zallt von Christi geburd tawsent jar drew hundert iar darnach in dem sechsvndnewnezkisten iar an Eritag nach vnser Vrawntag ze Lichtmezz.

Source Fulltext: OÖUB 11 (Wien 1983), S. 485