Wir Wilhelm vnd Albrecht etc. bekennen, als weilent der hochgeporn fürst vnser lieber herr vetter vnd vatter seliger gedechtnus vnserm getrewn maister Andresn vnserm jeger auf vnserm ampt ze Gmunden sein lebteg benennet hat vmb seinen dienst iericlich ze geben XXIIII tl. pfenning, daz wir darczu vnsern willen vnd gunst gegeben haben vnd bestetten auch dasselb leibgeding wissentlich mit dem brief vnd emphelhen vnserm getrewn vnserm amptman daselbs ze Gmunden, der ye denn ist, vnd wellen, daz er von den nuczen, so er von vnsern wegen jnnympt, demselben maister Andresn das egenant sein jargelt iericlich zu den vier Quatembern, als sittlich vnd gewonlich ist, fürderlich ausricht vnd beczal, die weil er lebt. Wan welchs iars er das getan hat, so sagen wir jn der ledig vnd wellen jm die an seiner rayttung legen vnd abcziehen. Mit vrkund etc. Datum Wiennae Domenica Reminiscere anno domini etc. nonagesimo sexto.

Source Fulltext: OÖUB 11 (Wien 1983), S. 487