Wir Wilhelm vnd Albrecht vettern von Gots gnaden herczogen ze Österreich ze Steyr ze Kernden vnd ze Krain grauen ze Tyrol etc. bekennen für uns vnser lieben brüder vettern vnd vnsern erben, das wir vnsern getrewen Casparn vnd Gundagkern geprüdern den Starhembergern vnd irn erben gelten sullen vnd schuldig sein tausent guldein vnd achthundert pfunt vnd fünfundnewntzig pfunt wiener pfenning, die sye vns yetzund zu vnsern vnd vnsers lannds notturfften berait habent gelihen. Dartzu haben wir in auch geslagen hundert pfunt derselben pfenning, die sy auf diss nachgeschriben vnser vesst Waldenfels mit guter gewissen vnd kuntschafft redleich vnd erberleich sullen verpawen. Also bringet die gantz summ tawsent gulden vnd newnhundert vnd fünfvndnewnczig phunt pfenning. Darfür wir in vnd irn erben versetzet vnd ingegeben haben wissentlich mit dem brief vnser egenant vesst ze Waldenfels mit allen den eern wirden rechten gütern gülten vnd nützen, die dartzu gehornt, also das sy die in ains rechten wernden phands weys an abslag der nutz sullen innehaben vnd nyessen, als satzs vnd lanndsrecht ist vnd als lanng vntz das wir oder vnser erben die von in mit dem vorgenanntten gelt gentzlich erledigen vnd erlösen. Derselben losung sy vns vnd vnsern erben auch zu allen zeitten sullen für sich stat tun vnd uns der gehorsam sein vnuertzogenlich vnd an alle Widerrede, wenn wir der begern vnd die an sy vordern an alles verziehen; wenn wir auch von in also lösen wellen, das sullen wir sy vor zween moned lassen wissen. Auch haben wir in von sundern gnaden die gnad getan, alle die weil und wir von in die egenannten vnser vesste nit haben gelöset, das sy dann das kirchlehen ze Waltpurg, das von vns zu lehen ist, sullen von der hand leihen, wem sy wellent, doch ainem erbern frummen priester. Wann aber derselb satz von in ist gelöset, so sol vns dasselb kirchenlehen damit ledig sein vnd sy noch ir erben sullen damit fürbasser nichts mer haben zu schaffen. Die egenanntten von Starhmberg vnd ir erben oder wer di obgenanntten vesst ze Waldenfels von irentwegen innehat, sullen vns vnsern brüdern vnd vettern vnd vnsern erben zu allen zeitten mit derselben vesst gewertig vnd gehorsam sein vnd vns die offen haben zu allen vnsern notturfften wider aller mänikleich nyemant ausgenomen vns vnd die vnsern, die wir dartzu schaffen, darin vnd daraus ze lassen vnd auch darinne zu enthalten, wenn vns sein not vnd durfft geschiecht doch an irn merklichen schaden vnd on geuerde. Wenn auch die egenannten Starhmberger oder ir erben desselben satzs nit lennger haben wellent, so mugen sy den ainem andern der vnsern, der in vnsern lannden sitzet vnd der vns gehorsam ist, für die vorgenanntten summ ingeben vnd versetzen, der vns auch damit gewärtig vnd gehorsam sey in allen der massen, als sy vns des sind gepunden gewesen, vnd wir sullen das dann mit vnsern priefen bestetten. Mit vrkund ditz briefs, daran wir baide insigel geschafft haben zu henken, der geben ist zu Wienne am Freytag nach Bartholomei apostoli nach Christi gepurde dreutzehenhundert jar darnach in dem sechsvndnewntzigisten jare.||
Domini duces per se audiverunt.

Source Fulltext: OÖUB 11 (Wien 1983), S. 532-534