Wir Wennzla von Gots gnaden Römischer Künig zu allen zeiten merer des reichs vnd künig zu Behem embieten dem edln Vlrichen grafen zu Schawnberg vnnsern vnd des reichs lieben getrewen vnser gnad vnd alles guet. Edler lieber getrewer; wann du durch notlicher sachen willen, die dir yetzund anligeundt sind, zu vns leiblich nicht komen magst, als wir des kuntlich vnderweyset sein, zu emphahen von vns deine lehen der grafschafft vnd herschafft lannd vnd lewte, die von todes wegen ettwen des edlnn graf Hainrichs von Schawnberg deins vaters an dich komen und gefallen sind, davon durch solicher trewen, der wir vns gennczlich zu dir versehen vnd auch durch dinste willen, die du vns tun soldest vnd machst in künftigen zeiten mit wollbedachtm mut guetm rat vnd rechter wysen, so haben wir dir solls dein lehen grafschafft lannd vnd lewte mit allen iren rechtn gerichten mewten vnd zugehorungen, die an dich von todes wegen des egenannten deins vatters recht vnd redlichen komen vnd gefallen sein vnd die von vns vnd dem reich zu lehen rueren, bey Mixen Rot vnnsern burggrafen zu Froburg vnd lieben getrewen genedigklich gesanndt vnd gelihen, sennden vnd leihen dir die in krafft ditz brief vnd romischer kuniglicher macht zu haben zu halden vnd zu besitzende in aller der mass, als die der egenant dein vater gehabt hat vnd besessen, also doch, daz du vns in des egenannten Mixen hennde gewondliche huldigung gelubd vnd ayde tun soldest vns vnd dem reich getrewe gewartund vnd gehorsam ze sein vnnsern frumen ze werbend vnd schadn ze wenden vnd alles das zethundt, das ain solcher graf gegen seinem rechtem ordenlichen natürlichen lehenshern von recht oder gewonhait zuthund phlichtig ist, doch also vernemlich wann wir dich mit vnnserm brief ermonnd, das du dann selber zu vns komest von vns zu empfahende leiblich deine lehen. Mit vrkund ditz briefs versigelt mit vnnser künigklichen maiestät insigel geben zu Charlstain nach Christes geburde drewzehenhundert iar vnd darnach in dem sechsvndnewzigisten iar an sannd Zimon vnd sannd Judastag, vnnsrer Reich des Behemischen in dem virvnddreissigisten vnd des Römischen in dem newnvndzwainzigisten jaren.

Source Fulltext: OÖUB 11 (Wien 1983), S. 548-549