Wir Albrecht etc. schaffen mit dir vnserm getrewn Martinen Stadler ze Stain vnser mautt ze Lincz jnnemer daselbs ze Stain vnd wellen ernstlich, daz du anstat vnd namen vnsers getrewn Jorgen des Enikleins yetzund vnsers mautter zv Lincz von vnsern nuczen vnsrer egenanten mautt daselbs ze Lintz, die geuallen sein, oder nachst hinfür geuallen, dem edlen vnserm sunder lieben vnd getrewn lantgraf Johansen von Leuchtenberg vor meinklichen gebest vnd ausrichtest an alles verziehen dreuhundert schok grosser Prager münss, die im zu jarsold von vns gepurent auf die nächsten vergangen sand Jörgen vnd sand Michelstag des gegenwürtigen sechs vnd newnczigisten jars, vnd wenn du jn der also ausgericht hast, so sagen wir den egenanten vnsern mautter vnd dich mitsampt jm derselben drewhundert schok an vnsrer obgenanten mautt ze Lyntz ledig vnd wellen ew die an ewrer nechst künftigen raittung legen vnd abcziehen. Mit vrkund dicz briefs geben ze Wienn an Freytag nach Allerheiligen tag LXXXXVIto.

Source Fulltext: OÖUB 11 (Wien 1983), S. 550