Wir Wilhalm vnd Albrecht vettern von Gotes gnaden herczogen ze Österreich ze Steyr ze Kernden vnd ze Krain grauen ze Tyrol etc. bekennen, als vnser getrewr lieber Seybot der Volkestorffer für Jörgen den Volkestorffer seinen vettern auzgeben hat den hernach geschriben juden vierhundert phunt vnd virczig phunt Wienner phenning nach lautt der brief, die er darumb von jn gelöst hat, des ersten Stewssen dem juden drewhundert phunt, item Jekklein dem eltern Stewssen drew vnd sibenzig phunt, item Ledrar dem juden von Enns aindlef phunt vnd Ysserlein Schalams des juden sun von Lyncz die vbrigen, vnd dafür er jm zu phant gesaczt hat das ober Haus Volkerstorff mit aller seiner zugehörung, daz wir durch desselben Jörgen fleizzig pet willen des obgenanten Seybots vber die egenant vesten vnd ir zugehörung rechter scherm sein wellen vor gewalt vnd vnrecht, also daz er vnd sein erben die obgenannt summ phenning darauf haben sull vnd der vor allen andern geltern, es sein kristen oder juden, dauon bekomen vnd genczlich ausgericht werden. Mit vrkund dicz briefs, geben ze Wienn an Freytag nach Gotzleichnamstag anno Domini millesimo trecentesimo nonagesimo septimo.||
Domini duces per dominum episcopum Frisingensem.

Source Fulltext: OÖUB 11 (Wien 1983), S. 617