Wir Albrecht von Gots gnaden herczog ze Österreich ze Steyr ze Kernden vnd ze Krain graf ze Tyrol etz. bechennen, das wir vnsern lieben getrewen Andren von Pollnhaim zu dyener aufgenomen haben vnd nemen auch wissentlich mit dem brief vnd benennen im auch vmb solichen seinen dienst ierleich ze gebenn fümfzig phunt Wienner phenning, die im zu den vier Quattembern yglichs iares von vns geuallen sullen, als gewöndlich ist, doch vncz an vnser widerruffen. Dauon empfehlen wir ernstlich vnserm getrewen Niclasen dem Weispacher vnsern gegenwurtigen amptmann oder wer ye zu den zeiten vnser obrister amptmann in Österreich ist vnd wellen, daz er den vorgenanten von Pollnhaim der egenanten fümfczig phunt phenning von den nuczen, so er von vnsern wegen ynnimet, alle jar fürderleich also richte vnd beczale auf die vorbenanten zeit, wan was er im der yedes jares also auzzricht vnd beczallt, der sagen wir in denn genczlich ledig vnd los vnd wellen im die an seiner raitung legen vnd abcziehen, alle dieweil vnd wir das nicht widerrufft haben an geuer. Mit vrchunt dicz briefs geben ze Wienn an Eritag nach sand Johanstag ze Sonnwenden nach Kristes gepurdt drewczehen hundert jar, darnach in dem siben vnd newnczigisten jare.

Source Fulltext: OÖUB 11 (Wien 1983), S. 620