Der hochgeporn durichlewchtigen fürstin fraw Beatricn herzogin ze Österreich etc. vnser gnedigen lieben frawn enbieten wir Marichart vnd Rakchcz geprüder dy Harrocher vnser willig vndertenig dinst. Genedigew fraw, wir lazzen ewer genad wizzen, daz wir Hansen dem Cynespan ewern burger ze der Freinstat ze chawffen haben geben siben chlainew gütel, gelegen in der Pehaymischen Styftung vnd in Freynstetter lant gericht vnd in Rainpekcher pharr, vnd ain holcz gelegen da pey, daz wir von ewern genaden ze lechen gehabt haben, dew senden wir ewern genaden auf mit dem brief vnd bitten ewr genad, daz ir dy geruchet ze leyhen dem obgenanten Hanssen dem Czynespan, daz wellen wir vmb ewr genad gern verdyenn, vnd wenn ir im geleicht, so sagen wir ewch der ledig vnd lozz. Mit vrchund dez briefs versigelt mit vnser paider aufgedrukchten insigel. Der brief ist geben an sand Lucastag anno Domini millesimo trecentesimo nonagesimo septimo.

Source Fulltext: OÖUB 11 (Wien 1983), S. 650